Shillong, Naitung 16
Ka surok 4-lane Shil-long-Pynursla-Dawki, kaba ka jingtrei ka dang ïaid shaid-shaid ha kiba bun ki bynta bad kaba la lah ruh ban pyndep ha ki bynta naduh Umshyrpi haduh Bañiun.
Ha kine ki khyndiat sngi ka la paw pyrthei, ba ka kynroh ha kane ka Surokbah, ka la orpait bad na ka liang ka kompeni, ka la theh da ka dewbilat ban pyndap ïa kane ka jaka kaba orpait.
Bun na ki paidbah ki pynpaw ïa ka jingbym shngaiñ lada ki kali kiba heh ki ïaid ha kine ki jaka, bad ka buh jingma ruh ba ha kano-kano ka por ka lah ban khyllem syndon.
Lah ban buh ka jingkylli, ba hato kane kadei ba u kontraktor u trei torti ne dei na ka daw ba kane ka jaka kaba ki shu pyndap da ka kyndew kam pat skhem bad ka dang jem namar ka jingjur jong u slap ha kine ki khyndiat sngi ba la dep?
Ka Sorkar kadei ban peit ïa kane ka Surokbah bad ban leh ei-ei noh kloi, ban lait na kino-kino ki jingjia ba sngewsih, khamtam ïa kito kiba ïaid na kane ka Surok ba man ka sngi.
Ym tang katta ngi lah ruh ban sakhi ba kane ka Surokbah na Shillong-Pynursla-Dawki, kaba dang shu dep shen, la bun ki jaka ba la dep pra bad la ïohi ba ka surok ka la ngam ha kaba ki kali kiba ïaid ki la hap ban ïaid suki ha kitei ki bynta, namar ka surok ka la ngam bad thliew.
