Shillong, Naitung 16
Ki nongrep kiba la mad ïa ka jinghiar dor u Kubi ha kine ki sngi kaba la neh kumba 2 bnai tam eiei, kaba la pynlong ïa ki ban shu sam ei noh ïa u jhur jong ki da kaba pynpaw ba kim sngewdon jingmut shuh ban dang die ïa u mar rep jong ki.
La ong ba kane ka jingsam ei ki nongrep ïa u mar rep jong ki sha ki paidbah ka long shibynta ban pynpaw ïa ka jingïeit ki nongrep ïa u mar rep jong ki, ha kaba ki sngew pang mynsiew ban shu bret kai ïa u mar ba ki la pynlut ka por ka bor bad ka pisa ha ka ban rep bad ban sumar, namar kata ka pynlong ïa ki nongrep ban pyrkhat ban shu sam ei da ka jingieit sha ki paidbah nongbam.
Ïa kine ki kubi ba la sam ei sha ki paidbah ha phyllaw ka State Central library, Shillong la wan kit kumba 2500 ton na ka thaiñ Mawpyrshong, Thynroit, Mawlali, Thangsning bad na kylleng ka thaiñ Smit.
Haba ïakren ïa u President ka Hills Farmer Union u Bah Commander Shangpliang u la ong ba kane ka jingleh ka long shibynta ban pynpaw ïa ka jingsngewsih namar ka jinghiar dor eh u kubi, ha kaba ki hap ban die tang ha ka dor 2 tyngka shi kilo kaba la long ryngkat bad ka jingai ei, da kaba pynpaw ba ki nongrep kim don jingmih shuh ka bai trei.
U la pynpaw ba ki nongrep mynta ki don hapdeng ka jingeh kaba khraw ban pynmih ïa ka bai trei, bai symbai, bai sboh bad kiwei ki jingpynbit pynbiang haba ïadei ka kam rep, namar kata u la kyntu ïa ka Sorkar ba kan thaw da ka komiti ka ban buh jingkheiñ ïa ki jinglut jingsep bad ba kan pyntreikam ïa ka Market Intervention Scheme (MIS) ïa baroh ki mar rep ka ban long ka jingïarap ïa ki nongrep.
Haba bynrap haba ïadei kane u Bah Allfondbirth Kharsyntiew u la ïathuh ba na ka shispah nur ka lyngkha, ka pynmih ïa u mar rep kumba 6000 kilo bad lada kheiñ ha ba ïadei ka jingpynlut ha kaba sumar bad ban pynkhuid ka jinglut ka poi sha ka T.60,000 bad lada kheiñ ïa ka jingduhnong ka long shaba palat.
