Tura, Ïaïong 28
Ka jingjia aksiden jong kawei ka trok Dumper ha ka Sngi U Blei ha Tura ka la ïalam sha ka jingmynsaw jur jong uwei u nongñiah thuk-thuk.
Katei ka jingjia ka la jia hajan MBOSE ha lad Upper Matchikolgre, Tura ha kaba katei ka trok kaba don ïa u nombor – ML-08-K-0925, ka la ïuh ïa utei u nongñiah thuk-thuk bad paring ruh ïa ka thuk-thuk shaduh sha Bokmagre, kumba katto-katne ka jingjngai.
Ïa utei uba la mynsaw jur ha ka bynta jong ka kjat, la pynkit noh sha Tura Civil Hospital.
Katei ka jingjia ka la wan jia hadien jong kawei pat ka jingjia aksiden kaba ïasyriem kum katei kajuh ka jingjia kaba la jia dang shen ha Ballonggre, ha kaba ka khynnah ba dang 14 snem ka rta ka la duh noh shiteng na ka kjat jong ka katba uba don lang (bad ka) u la mynsaw malu-mala.
Halor katei ka jingjia ba hashuwa, ka New Tura Development Forum (NTDF) kumjuh kiwei ki kynhun seng ki la dawa na bynta ban pyrkhing haba ïadei bad ka rung ka mih jong kiba kum kitei ki trok sha ki jaka sor. Hynrei na ka liang ki bor pynïaid distrik haduh mynta kim pat leh eiei halor katei ka jingdawa.
