Porbandar, Ïaïong 28
Ki shipai Indian Coast Guard ki la ïoh ban kurup haduh 86 kilo u drok ba shongdor T. 600 klur na kawei ka lieng kaba wan na Pakistan.
Hadien ba la ïoh jingtip na ki tnat syntiat, ki shipai Coast Guard ryngkat bad ki pulit ka Anti-terrorism Squad (ATS) bad Narcotics Control Bureau (NCB), ki la pynlong ka jingthwet ïa kito kiba donkti ban khaïi drok lyngba ka duriaw.
Ha u kyrwoh khubor, ka tnat Coast Guard ka la ong ba ha ryngkat bad utei u drok, la kem ruh ïa 14 ngut ki briew na katei ka lieng kaba la wan na Pakistan.
“Ha ka jingjop ka bakhraw hynnin ka sngi, ki shipai Indian Coast Guard ki la pynlong ïa ka jingkhynra, bad ki la ïoh ban kurup kumba 86 kilo u drok ba shongdor T. 600 klur bad la kem ruh ïa 14 ngut ki briew na ka lieng kaba la wan na Pakistan,” la ong ka tnat Coast Guard.
Na ka liang ka Coast Guard ka la pyndonkam da ki jhad bad ki liengsuiñ ban pynthikna ba ka jingkhynra kan long kaba jop. La pyndonkam ruh ïa kawei ka jhad ‘Rajratan’ bad ha kane, la don ki heh jong ka NCB bad ATS.
Wat la ki briew kiba don ha katei ka lieng ki la pyrshang ban kiar na ka jingshah kem, hynrei ki shipai Coast Guard ki khlem ailad bad ki la ïoh ban bat ïa ki.
Hadien ba la bat ïa katei ka lieng, ki shipai Coast Guard ki la pynlong ïa ka jingkhynra bad ki la lap ïa ka jingdon jong u drok.
“Wat la katei ka lieng ka la pyrshang ban kiar khnang ban lait na ka jingshah kem, hynrei ki jingpyrshang baroh ki la pulom na ka jingdon jong ka jhad Rajratan. Ki kynhun kyrpang ki la leit rung sha katei ka lieng bad hadien ka jingwad bniah, la lap ïa ka jingdon jong shibun bah u drok,” la ong ka Coast Guard.
Ïa katei ka lieng na Pakistan ryngkat bad ki briew kiba don lang la wanlam noh sha Porbandar ha Gujarat ban pynlong ïa ka jingtohkit kaba bniah.
