Aizawl, Ïaïong 28 (UNI)
Wat la ka tnat Korbar Ri (Ministry of Home Affairs) ka khlem pat pyntip thikna sha ka sorkar Mizoram halor ka jingkhang noh ïa u khappud Mizoram-Myanmar, hynrei ki shipai ka Assam Rifles ki la leit ai jingtip sha ki nongshong shnong kiba shong ba sah hajan khappud bad ïa une u khappud yn khang noh naduh ka 1 tarik Jymmang, la ïathuh uwei u heh ka tnat Korbar Jylla.
U Commissioner ka tnat Korbar Jylla ka Mizoram, u H. Lalengmawia, u la ong ba ka sorkar jylla ka khlem pat ïoh jingthoh eiei na ka Sorkar Pdeng bad ba ha ka jingshisha, ka sorkar jylla ka la dei ban ïoh jingtip na ka tnat Korbar Ri halor ka jingthmu ban khang noh naduh ka 1 tarik Jymmang ïa u khappud hapdeng ka Mizoram bad Myanmar uba jrong haduh 404 km.
Ki khubor na ki shnong kiba don ha Champhai distrik hajan u khappud bad ka Myanmar ki ïathuh ba ki nongïalam jong ki shnong Zote, Ngur, Ruantlang, bad Hmunhmeltha bad kumjuh ruh jong ka Young Mizo Association (YMA) ha Champhai distrik lem bad ki nongïalam ka Champhai South Joint Village Council bad Champhai North Joint Village Council, ki la shah khot ha ki Assam Rifles sha ka jingïalang ha ka ktem jong ki Assam Rifles ha ka 23 tarik Ïaïong.
La ong ruh ba na ka liang ki bor ki shipai Assam Rifles ki la pyntip sha kitei ki nongïalam shnong ba ïa u khappud hapdeng ka Mizoram bad Myanmar yn khang khyrdep naduh ka 1 tarik Jymmang, bad kane ka long katkum ka jingbthah ba la ïoh na ka tnat Korbar Ri jong ka Sorkar Pdeng. Ha kajuh ka por, la ong ba yn khang ïa ki ïew khappud ha katei kajuh hi ka sngi.
Hynrei, yn ai da ki ‘Permit’ sha kito kiba donkam ban leit ha ki kam ba kyrkieh, bad ïa kine yn sa pynrung kyrteng, la ong ki Assam Rifles. Nalorkata, ki shipai Assam Rifles ki la pyntip ba la shim ïa ki sienjam ban peit bniah ïa ka jingkhaïi drok na shiliang khappud.
Na ka liang u Deputy Commissioner ka Champhai distrik, u James Lalrinchhana, u la thoh da ka shithi sha ki heh ka Assam Rifles ban kylli na kaei ka daw ba ki Assam Rifles ki la bteng ban khang ïa u khappud Mizoram-Myanmar khlem ka jingtip jong ki bor distrik hadien ba la kut ka jingthep ‘vote’ na ka bynta ka ilekshon MP ha Mizoram ha ka 19 tarik Ïaïong.
