Shillong, Ïaïong 29
Ka jingsawa ka sur ba ka Congress ka khlaiñ bha ha kane ka ilekshon MP na Tura Lok Sabha konstitwensi ka la nang pynshisha namarba wat ki ‘vote’ ka Trinamool Congress (TMC) ruh ki kynriah sha ka Congress ha ki khyndiat sngi shwa ban poi ka sngi thep ‘vote’ ha ka 19 tarik mynta u Ïaïong.
U Myntri ka Sorkar Jylla uba dei ruh u MLA bad kham paw ka NPP na ki jaka them ka Rilum Garo, u AT Mondal u la ong ba da ka jingsngew skhem ba ka kyrtong ka NPP ka Agatha K Sangma kan jop biang na Tura ha kane ka ilekshon khlem artatien.
Hynrei wat une u MLA ka NPP u la kubur ba ka TMC ka pynphet ïa ki ‘vote’ sha ka Congress tang hapdeng ki khyndiat sngi shwa ban poi ka sngi thep ‘vote’.
Tangba u Mondal u la ong ba ka jingpynphai ka TMC ïa ki ‘vote’ sha ka Congress kam don jingktah namar lada bun kiba leit shata ruh hynrei kiba wan sha ka NPP ruh ki bun.
U Mondal u la ong ba kane ka jingkynriah ki ‘vote’ lehse ka dei ka jingsngew jong ki nongkyrshan ba ka lad kaba kham biang ban ïakhun bad ka NPP ka dei ka Congress ym ka TMC.
Kumta u la ong ba ka NPP kan jop beit na Tura hynrei um lah ban ong haba ïadei bad Shillong Parliamentary konstitwensi. U Mondal u la ong ba wat ki nongthep ‘vote’ kiba ju kyrshan ïa ka BJP ha Rilum Garo ki kyrshan lang ïa ka NPP ha kane ka kynti.
Shuh shuh u Mondal u la ong ba ha ka ilekshon, ka jingkwah ka long ban ïoh jingjop sa kaba tam bun, hynrei ka jingjop ha kano-kano ka ilekshon ka dei hi ka jingjop lada tam tang shi ‘vote’ ruh.
Dang shen ka nongïalam ka Congress ka Deborah C Marak ruh ka la pynpaw ka jingsngew skhem ba u kyrtong ka Congress u Saleng A Sangma un ïoh jingjop ha kane ka ilekshon Lok Sabha na Tura konstitwensi.
U Saleng kum u kyrtong u ïoh jingkyrshan bha na ki paidbah wat haba ym pat don ka jingkynriah ki ‘vote’ na ka TMC. La sakhi ba wat ki paidbah ki ai pisa kum ka jingkitbok ïa u ha kane ka ilekshon, bad don ruh kiba noh synñiang da ki mar bam bad ki jhur.
