Khliehriat, Ïaïong 29
Ka synjuk ki trai trok hapoh ka lama Jaiñtia Hills Truck Owner Association (JHTOA) ka la sdang ïa ka jingïakhih ba khlem buh por da kaba bat bad pynphai ïa kumba 30 tylli ki trok kit mar jong ki karkhana pynmih dewbilat.
Kane ka jingïakhih jong ka JHTOA ka dei hadien ka jingshah thok shah shukor kaba man ka por ha ka synjuk ki karkhana pynmih dewbilat kiba don ha ka thaiñ East Jaiñtia Hills District.
Haba ïakren bad u President ka JHTOA u Bah Biangshwa Shylla u la ong, ka synjuk ha ka jingshong jingïalang kyrkieh ha ka 29 tarik mynta u bnai ha shlem treikam ka JHTOA kaba don ha Tuber Tahkhniang, East Jaiñtia Hills da kawei ka sur ka la rai ban sdang noh ïa ka jingïakhih kaba khlem buh por.
“Ha ka sngi sdang jong ka jingïakhih ngi la bat bad pynphai ïa kumba 30 tylli ki trok kiba dei jong ki saw tylli ki karkhana pynmih dewbilat khamtam ki trok jong ka Star Cement, Dalmia, Amrit bad Green Valley”, la ong u Bah Shylla bad bynrap ba kane ka jingïakhih kan dang bteng nangne shakhmat.
U la pynkynmaw ruh ba dang shen ka la don ka jingïalang hapdeng ka synjuk ki trai trok, ka synjuk ki karkhana pynmih dewbilat bad ki bor pynïaid district jong ka East Jaiñtia ban pynbeit ïa ka rukom kit rukom bah. Na ka liang ka synjuk ki karkhana pynmih dewbilat ruh ki la ai ka jingmynjur ban ai bhah ban kit 40 tylli ki trok ha ka shi sngi hynrei ha kine ki shi bnai kitei saw tylli ki karkhana kim bat ïa ka kular.
