Nongpoh, Ïaïong 29
Ha kawei ka jingjia kaba la jia ha ka nohphai sngi jong ka Lah Sngi U Blei, kawei ka trok kaba don ïa u registration number JK05-H-0666 kaba dang pynïeng harud ka surok bah NH-6 hajan ka shnong Jyntru, ka la kem ding kyndit kynsan haduh ba kan da ingkhong hi khait.
Katkum ka jingtip kaba la ïoh lum, la ïathuh ba katei ka trok ka dei kaba kit jri bad kaba dang ïeng harud ka surok bah ban hiar sha Guwahati. Hynrei ha ka por kumba 2 baje tam eiei katei ka trok ka la kem ding kyndit-kynsan. Haba pyrshang ban kylli na u nongñiah katei ka trok, u la ong ba um lah satia ban tip na kaei ka daw, hynrei u la suba lehse ka lah ban dei na ka jingthut ka ‘wiring’ jong ka trok.
Ha kane ka jingjia, u nongñiah u la lait na ka jingmynsaw hadien ba u la kloi ban mih shabar shwa ba ka ding kan klang, katba u nongbud pat la ïathuh ba u la ngat ha ka jingmynsaw bad la pynkit noh mar-mar sha ka jaka ai jingsumar lyngba ka kali kit nongpang 108.
Kat haduh ba ki pulit pynlip ding kin lah ban tem ïa ka ding ha ka por janmiet, la ïohi ba katei ka trok ka la sah satang ka shynrong suda. Halor kane ka jingjia, ki pulit ki dang pynlong ruh ïa ka jingtohkit ban lap ïa ka daw tynrai jong ka jingkem ding kynsan jong katei ka trok.
