Tura, Ïaïong 29
Hadien jong ar tylli ki jingjia aksiden kiba jur kiba la jia ha Tura ba kynthup ïa ki trok ‘Dumper’ ha kaba 2 ngut ki briew ki la mynsaw jur, ki bor distrik ka West Garo Hills ha ka Lah Sngi U Blei ki la pynmih ïa ki jingpyrkhing halor ki kali heh kiba ju ïaid lyngba ki jaka Municipal.
Ka jingpynmih ïa kane ka hukum da ki bor distrik ka la wan hadien ka jingïakhih shong kyllaiñ mungor ba la pynlong da ki kynhun seng kum ka ADE, FKJGP, FAF, AYWO, GSU bad ka Garo Hills United Labour Union (GHULU), hakhmat shlem treikam Deputy Commissioner ha kane kajuh ka sngi.
“Hashuwa, ngi la phah ïa ka jingujor sha u Deputy Commissioner ban kyrpad na bynta ki jingpyrkhing haba ïadei bad ki trok kiba rung sha ka jaka sor. Wat la kam shym la don kano-kano ka jubab na ka liang jong ki tad haduh ban da pynlong ïa kane ka jingïakhih, ngi kmen shi kat dei ba la pynmih ïa kane ka hukum,” la ong u President ka GSU, Zikku Balgra N. Marak hadien ka jingïakhih.
Katkum ka hukum, la khang ïa ki trok kiba kit mar (palat 9 metric ton) ban rung sha ki jaka sor la ka long ha kano-kano ka por, lait noh da ki la ïoh jingbit na ki bor distrik katba kito kiba kit mar hapoh ka 9 metric ton ki lah ban ïaid na ki jaka sor tang hapdeng ka 9 baje mynmiet haduh 6 baje mynstep. Hynrei, ki kali Sorkar, kito kiba la pyndonkam na bynta ki kam Sorkar bad ki kali khwai, kali kit paidbah lem bad kiwei-kiwei ki kali donkam kin ym shah khang ha katei ka hukum.
Ha kawei ka liang, katei ka hukum ka la pynmih ruh ïa ka jingbthah ïa ki kali shimet bad ki ar-shaka ban bud ryntih ïa ki kyndon pynïaid kali kum ka jingphong ïa ki ‘helmet’ bad ka jingpyndait ïa u panpoh haba shong kali (seat belt) kumjuh ka jingmaham kaba tyngeh ïa kiba ñiah kali ynda la shoh u khawiang. Baroh ki nongpynkheiñ ïa kine ki kyndon kin ngat ha ka kuna bad ka jingpynshitom katkum ki kyndon jong ka aiñ.
Katkum katei ka hukum, haba ïadei bad ka jingdawa bai lutksan sha ki lanot, u Deputy Commissioner un hap khmih bniah shuwa ïa kane ka bynta da kaba phai khmat sha ka Hit and Run Motor Accidents Scheme, 2022 da kaba bud ïa ka kyndon 161 jong ka MV Act ban pynbiang ïa ki lad jingïarap ba shi por sha ki lanot ne ki bahaïing jong ki.
