Nongpoh, Ïaïong 29
Ki nongïalam jong ka Hynñiewtrep Achik National Movement (HANM) Sengkmie ha ka Lah Sngi U Blei ki pynbna paidbah ba la beh seng noh shisyndon ïa u Bah Ajit Makri uba bat kum u President jong ka HANM Ri Bhoi District halor ka jingleh pyrshah ïa ki kyndon treikam jong ka seng.
Haba kren sha ki lad pathai khubor, ki nongïalam ka Sengkmie ba kynthup ïa u Bah Bawan Nongsiej, Vice President bad u Bah Raiwan Sohtun, General Secretary ki la ong ba ka seng kam banse ban shim ïa kane ka sienjam hadien ba ka la lap bad ïohi ba u Bah Ajit Makri u don ïa ka jingthmu ban pynthohbria, pyntroiñ bad pynpait pynpra ïa ka seng ym tang ha ka district hynrei wat ha ka Sengkmie ruh kumjuh.
Ki la pyntip ruh ba kane ka jingshim rai ban beh seng noh ïa utei u nongïalam ka seng ha Ri Bhoi ka dei ruh hadien ka jingïamir jingmut hapdeng ki nongïalam jong ka Sengkmie bad Ri Bhoi District kaba la pynlong ha ka Lah Sngi U Blei ha kaba ki la ong ba ki kam kiba utei u nongïalam ka Ri Bhoi u leh ka long ka bym lah satia ban pdiang.
Halor kane bynta, ki nongïalam ki la pynpaw ruh ba naduh kane ka sngi, ka seng kam don jingithuh shuh ïa u Bah Ajit Makri bad un nym ïadon bynta shuh bad ka seng nangne shakhmat da kaba pyntip ruh ka seng ka la thung bujli da u Bah Donroi Kshiar kum u President bathymmai jong ka HANM Ri Bhoi District.
