Shillong, Ïaïong 29
U shongknor (Chairman) ka National Commission for the Protection of Child Rights (NCPCR), u Priyank Kanoongo, uba la leit sha South West Garo Hills ban tohkit halor ka jingshah leh be-ijot jong ar ngut ki kynthei kiba dang rit rta, u la ong ba ka don ka jingsuba ba kiba la donkti ha kane ka kam bymman ki dei ki Rohingya Muslim.
U Kanoongo, ha ka Sngi U Blei, u la hiar sha ka shnong ba la don ka jingshah leh be-ijot jong kitei ar ngut ki khynnah kiba dang hapoh 18 snem ka rta kaba la jia ha ka 16 tarik Ïaïong, 2024.
Ha ka jingleit jong u, u shongknor ka NCPCR u la ïakynduh ïa ki bahaïing hasem jong kitei ar ngut ki khynnah bad u la ong ba ka don ka jingsuba ba kito kiba donkti ki lah ban dei ki Rohingya Muslim.
Lah ban kdew ba katei ka la jia ha ka sngi ba la pynlong ïa ka ‘Chenga Benga Mela’ ha South West Garo Hills.
Kum ban pynkynmaw, ki pulit ka South West Garo Hills ha ka Sngi U Blei ki la kem noh ïa u suba donkti ba 9 na Hatsingimari, Assam halor ka jingkynnoh leh be-ijot ïa kitei ar ngut.
Ha ka 27 tarik mynta u bnai, ki pulit ki la kem ïa u runar ba hakhmat eh jong katei ka jingjia na Teporpara Bazaar, Assam. Ïa kitei, la aiti noh sha ki pulit na bynta 4 sngi ban tohkit.
Ha ka 26 tarik mynta u bnai, ki pulit ki la kem ïa 3 ngut ki samla kiba hapdeng ka rta 22 haduh 25 snem na South Salmara District, Assam – khappud bad ka South West Garo Hills.
Na ki 4 ngut kiba la shah kem kham hashuwa, uwei u la shah kem na kawei ka bos na Rajabala, West Garo Hills katba u dang leit sha Guwahati, sa uwei pat na Teporpara (khappud Assam-Meghalaya) katba ki 2 ngut kiwei pat ha ki pulit Assam na Hatsingimari, South Salmara, Assam.
Ha ka kyrwoh ha ka Sngi U Blei, u SP ka distrik, u Vikash Kumar u la ong ba katkum ki jingtip ba ïadei bad ka jingrahbor, byrngem be-aiñ, thombor, bad ka jingleh be-ijot ïa kiba hapoh 18 snem ha ka 16 tarik Ïaïong ha Chenga Benga Mela, la pynngat mukotduma hi da ki pulit hapoh thanat Ampati.
Ha kajuh ka por, la ïoh lum ruh ïa ki sabut na jaka jong ka jingjia bad katkum ka jingphla jong kiba la ngat ha katei ka apot, ki kaiphod eksamin lem bad kiwei-kiwei ki sabut, la kem ïa 9 ngut kiba suba donkti ha katei ka kam haduh mynta.
Baroh kitei kiba shah kem ki dei ki nongshong shnong ka Teporpara (Assam) kaba don hajan ka jaka jong ka jingjia bad ka jingkem ïa kitei la synran lang da ki pulit ka South Salmara District. La kurup ruh ïa 7 tylli ki ‘mobile phone’ na kitei kiba shah kem bad la khmih bniah bin-pa-bin ïa ki, ong ki pulit.
Lyngba ka jingtohkit, la lap ba ki runar ki la knieh noh ïa ka ‘mobile phone’ na uwei u briew bad byrngem ruh ha ryngkat ka jingdawa pisa na uwei pat u briew. Haba ïadei bad kane, ki pulit ki la pynngat mukotduma ha thanat Ampati.
Katei ka jingjia ka la paw pyrthei hadien ba ki kmie ki kpa jong kitei ar ngut khynnah kynthei ki la leit pyntip sha ki pulit ha ka 18 tarik Ïaïong.
Na ka liang u Kanoongo u la pyntip ba nalor jong katei ka jingjia shah leh be-ijot, sa arngut ki khynnah shynrang kiba la synran ïa kitei ki khynnah kynthei ki la shah shoh shah dat ha kitei ki runar bad la knieh ruh ïa ki Mobile Phone na ki. U la ong ba uwei u la shah teh ha trai dieng da bun kynta bad uwei pat u la shah tied na khlieh bad u khlem tip briew.
Shuh shuh utei shongknor ka NCPCR u la pyntip ba un sa ai da ka kaiphod sha ka Sorkar Pdeng bad sha ka sorkar jylla bad ban pynthikna ba kiba kum kitei ki kam bymman kin ym jia shuh hadien habud. U la ong ba ka NCPCR kan pynthikna ruh ba baroh kiba donkti ha katei ka jingjia kin shah kem ha ki pulit bad kin ngat ha ka jingshah pynshitom katkum ka aiñ.
