Shillong, Ïaïong 29
Wat la ka Meghalaya Energy Corporation Limited (MeECL) kam pat pynbna ban pyntreikam ïa ka jingpynlip bording lane ‘loadshedding’, hynrei ki paidbah ki la hap ban mad ïa ka jinglip ka bording kaba khah-khah ha kine ki khyndiat taïew, kaba la pynpyrkhat ïa kiba bun ba lehse ka la sdang treikam ka ‘loadshedding’.
Na ka liang u Myntri ka tnat bording, u AT Mondal u la ong ba ha ka jingshisha, ka Sorkar ha ryngkat ka MeECL ki la shim lypa ïa ki lad ki lynti kiba la ïarap mynta u snem ban nym pat pyntreikam ïa ka jingpynlip bording ilektrik (loadshedding) wat ha kine ki bnai ba rang tyrkhong ka suiñbneng.
Hynrei u kubur ba ki don ki por ba hap ban pynsangeh ïa ka jingsam bording na ka daw kiba bun ki kam maramot ha kylleng kiba hap ban leh namar ka jingshah lynshop ha ki bor ka mariang kum ka jingrat ka lyer, ‘leilieh ne pyrkhat, bad ka jingduh ki transformer.
Haba ïakren bad ki nongthoh khubor ha ka Lah Sngi U Blei, u Mondal u la ong ba na ka liang ka Sorkar Jylla ka la shim ki lad ki lynti ban nym pat pyntreikam ïa ka jingpynlip bording ym kumba long ha u snem ba la dep ha kaba la hap ban pynlip bording bun kynta ha ki jaka sor bad ha thaiñ nongkyndong jong ka Jylla baroh kawei.
U la pynshai ka jingpynlip ïa ka bording kumba ka long mynta ka dei tang na ka daw ki kam maramot ha kaba ki don ki jaka ba ka shim por bun kynta ban pyndep ïa ka jingmaramot.
U la ong ba ka jingkhlaiñ jong ka lyer ka pynlong ban khyllem ki dieng ha ki waïar ilektrik bad don ruh ba ki transformer ki julor ba shah tied ‘leilieh ne pyrkhat nalor kiwei kiwei ki daw kiba pynlong ban thut ka jingsam bording ilektrik.
U Mondal uba dang shu wanphai sha ka shlem treikam hadien ba la kut ka jingïalap ilekshon bad thep vote, u la ong ba ha kine ki khyndiat sngi, un sa lum ïa ka jingïalang bad ki ophisar ka tnat bording ban sngewthuh kham bha ïa ka jinglong-jingman ha ka liang ka jingdon ka bording bad kumno ban shim ïa ki sienjam kiba biang na ka bynta ki paidbah.
U la pynpaw ruh ka jingkmen ba mynta u snem wat hapdeng kiba bun ki jingeh, ka jingpynlip bording kam pat treikam ha kaba ka la long ruh ka jingïarap ïa ki samla pule kiba pynkhreh ïa ki eksamin bapher bapher bad kumjuh ïa ki nongshong shnong, ym kumba ka jia ha u snem ba la dep ha kaba ka um ruh ka la hiar bha namar ka jingbym ïoh slap.
U la ong ba ka jinghap slap kloi kan ïarap shikatdei eh ban kham ïoh ïa ka bording kaba kham biang wat lada donkam ruh ban thied bording na shabar ban pyndap ïa ka jingdonkam bording ha kane ka Jylla.
