Nongpoh, Ïaïong 30
Ha kawei ka jingjia ha ka step phyrngab jong ka Sngi Ba-ar, ki nonglute ki bym lah satia ban ithuh ki la ïoh ban lute na ka kawei ka kali kaba don ïa u registration number AS01-JC-9434 kaba dei ka kali kit khubor jong ‘Meghalaya Guardian’ katba ka dang thmu ban wan pynpoi khubor sha ka jylla na nongbah Guwahati.
Katkum ka jingtip ba la ïohlum, la ïathuh ba katei ka jingjia ka la jia ha ka por kumba 5 baje mynstep ha kaba ki nonglute kiba don kumba saw ngut eiei, ki la ïoh ban pynsangeh ïa katei ka kali ha ka surok bah National Highway 6 ha Umling bad shoh ïa u nongñiah uba la tip kyrteng kum u Biren Boro.
Hadien ba kitei ki runar ki la dep ban shoh ïa utei u nongñiah, ki la knieh ïa ka mobile phone ka jong u lem bad ka pisa bad nangta ban phet krad ïalade na katei ka jaka.
Halor kane ka jingjia, utei u nongñiah jong ka kali kit khubor ‘Meghalaya Guardian’ u la leit ban ujor da ka ejahar ha thanat Nongpoh bad na ka liang ki pulit mynta ki dang pynlong ïa ka jingthwet ban ïoh kem ïa kitei ki runar kiba donkti ha katei ka kam lute.
