Shillong, Ïaïong 30
Wat hapdeng ka jingtyrkhong bad shit kyrang ka sngi, ki khlaw ki la nang shah wiangding ha ki ‘riew shim kabu ki bym pyrkhat satia ïa ka jingshah ktah ka mei mariang kaba lah ban pynpoi sha ka jingkyrduh um ha kane ka sla pyrthei.
Ka jingshit kyrang ka sngi bad jingbeh ka lyer ka la nang pyntyrkhong ïa ka mei mariang ha kine ki sngi. Kaba pynsniew shuh shuh ïa ka mariang ka dei ka jingthang dusmon ïa ki khlaw ki btap.
Ha kylleng ki jaka, bun ki jingthang khlaw ki la jia bad kane ka la nang buh jingma ïa ka mei mariang khamtam ki tyllong um kiba ju bsa umbam-umdih ïa ki nongshong shnong.
Haba ïakren bad ki ophisar ka tnat kaba peit ïa ki khlaw ki btap, ki la ong ba haduh mynta kaba lah ban ujor pyrshah ïa ki briew kiba thang khlaw ka dei katkum ki kyndon aiñ ba leh ïa ki kam runar.
Ki la ong ba don bun ki tynrai dieng kiba la thung ha kylleng ki jaka hynrei ki don ruh ki tynrai dieng kiba khlem lah ban pynheh pynsan namar ka jingbam ki mrad bad jingthang pluh ïa ki lum ki wah.
Ki don ruh ki jingjia ha kaba la sakhi ba ki shnong kiba don marjan bad ki khlaw ki don jingma namar ka jingwiang ding ia ki khlaw.
Haba ïakren bad ki katto-katne ngut ki Rangbah Shnong ki la ong ba ka aiñ ka dei ban kham khlaiñ ban tehlakam ïa ka jingthang khlaw pathar ki ‘riew shim kabu kaba la ktah shisha ïa ka mariang bad kaba buh jingma tam ka dei ia ki tyllong um.
Kumta ki nongïalam shnong ki la ong ba ka tnat khlaw jong ka Sorkar Jylla ka dei ban shimkhia ban tehlakam ïa ka jingthang khlaw pathar ki ‘riew dusmon bad dei ban kem ïa ki bad pynngat ha ki kyndon jong ka aiñ khnang ba ki riew dusmon kin nym bud ban leh katba mon ia ki khlaw ki btap.
