Shillong, Ïaïong 30
Ki Sector Commander jong shipai Border Security Force (BSF) bad Border Guard Bangladesh (BGB) ki la pynlong ka jingïakynduh ha Gumaghat Border Outpost ha South West Khasi Hills ha ka Lah Sngi U Blei ban ïakren halor ki mat khappud bad kiwei-kiwei.
Ïa ka kynhun jong BSF la ïalam da u Manoj Kumar Barnwal, DIG, Sector HQ BSF Shillong katba u Md. Saiful Islam Chowdhury, Deputy Director General, Sector Commander BGB, Sylhet, Bangladesh u la lamkhmat ïa ka kynhun BGB.
Ha katei ka jingïalang, baroh arliang mamla ki la ïakren halor ki mat kiba ïadei bad ki mat khappud kum ka Co-ordinated Border Management Plan bad kiwei pat kiba long ka jingmyntoi ïa baroh ar.
Ha kaba kut jong ka jingïalang, kitei arliang mamla ki la pynpaw ïa ka jingsngewhun halor ka jingïakren kaba pynphalang ïa ka jingïadei paralok hapdeng ka India bad ka Bangladesh. Ha kajuh ka por, baroh arliang ki la rai ban pyntreikam kham kloi ïa ki rai ba ki la shim lang.
