Shillong, Ïaïong 30
U Bah Kyrmen Shylla uba dei u nongïalam ka United Democratic Party (UDP) bad uba long ruh u Myntri ka Sorkar Jylla, u la ong ba ka long kaba eh ban batai lypa mano ban jop ha kane ka ilekshon MP napoh ka Shillong Parliamentary Constituency.
“Lada phi kylli ïa nga bad ïa ka UDP kaba ngi don, ka jubab kan long beit ba ngin jop ma ngi ha kane ka ilekshon,” la ong u Bah Kyrmen haba kren sha ki lad pathai khubor ha ka Sngi Ba-ar
U Bah Kyrmen u la ong, ka long shisha kaba eh bha mynta ban batai ne ïathuh lypa mano ban jop hynrei ïa kane ka jingkylli lada phi kylli na ka UDP, ka jubab kan long beit ba yn jop ka UDP. Lada kylli na ki briew ka Congress kin ong ba kin jop beit, na ka VPP bad NPP bad kumta ter ter, ha kaba baroh-baroh kin kam beit ba ki don jingkyrmen ban jop.
“Wat la ka jingñiew ïa ki ‘vote’ kan sa long haduh u bnai Jylliew, hynrei ha kane ka kynti ka long shisha kaba eh ban ïathuh lypa mano ban ïoh mihkhmat sha Delhi, hynrei mano-mano ba jop ïa ka ilekshon, ngi khmih lynti ban dei kita ki ban trei na ka bynta ki paidbah,” la ong u Bah Kyrmen.
Haba kylli halor ka jingmih u paidbah sha ka jingïalang ka VPP ha kane ka ilekshon MP, u Bah Kyrmen u la ong, “Tang ki briew kiba leit ha ki jingïalang ïalap ilekshon kam pat dap ban jop ïa ka ilekshon, namar u kyrtong hi u donkam ïa ka jingïoh vote ka ban kot shaduh ka 3 lak eiei ban ïoh ka jingjop.”
“Kiba bun ki seng saiñ pyrthei kiba la pynlong ïa ki jingïalang paidbah, la shem ba u paidbah uba poi ym shim la poi tang shi lak ruh. Ngim lah ban ong ba tang na ka jingbun briew kin lah ban kam ba kin jop noh ïa ka ilekshon namar donkam ban ïoh ïa ka jingkyrshan ym tang na kiba wan sha ki jingïalang hynrei donkam ruh wat na kito ki bym mih ban ïahsimbynta ha ki jingïalap ilekshon,” la ong u Bah Kyrmen.
Une u nongïalam ka UDP u la ong, ba u ngeit skhem ba ki paidbah kiba mih ha ki jingïalang bad wat kito ki bym mih ha ka jingïalang, ki dei kiba dang ieid bad shaniah ïa ka UDP bad kane hi kan dang aibor ïa ka UDP ban ïakhun ha ki ilekhson kiban dang wan.
Ha kaba ïadei pat bad u kyrtong ba pynïeng ka Regional Democratic Alliance (RDA), u Bah Kyrmen u la ong, “Ka jingjop ne jingrem kam dei satia ha ki kti jong ngi hynrei ngi la trei shitom bha ban jop ïa kane ka ilekshon. Ngi la ïohi ba baroh ki MLA ki la trei shitom bha 100 na ka 100 hynrei ha kaba khatduh hi kan shong ha u paidbah ïano un jied”.
U Bah Kyrmen u la ai khublei ruh ïa baroh ki MLA ha ka kynhun RDA kiba la trei shitom bad kane ka pyni ïa ka jingïatylli bad ha ki snem kiban dang wan ruh kin bteng ban ïatreilang da ka jingïatylli.
