Shillong, Ïaïong 30
Ha ka step jong ka 30 tarik u Ïaïong, ka ding kaba la klang bha ka la pur kynsan ha syndah jong kawei ka ïing kaba don ha ka dong Sawmer Shiteng, Upper Shillong ha kaba kane ka jingpur jong ka ding ka la pynshong syier ïa ki paid nongshong shnong baroh kawei.
Haba ïoh ban ïakren bad ki nongshong shnong, ki la ïathuh ba kane ka jingwan pur ka ding ka la jia ha ka por kumba 11 baje eiei mynstep. Ki la ïathuh ruh ba katei ka ding kaba klang ka dei kaba wan na shiliang u lum jong ka shnong na ka daw ka jingdon kiba thang ïa u ñiut hapoh katei ka khlaw.
Kitei ki nongshong shnong ki la ïathuh ba ka daw kaba la pynlong ïa ka ding ba kan rhem bad pur sted kynsan ka dei namar ka jingjur palat ka lyer.
Shuh shuh na ka liang kitei ki nongshong shnong ki la ïathuh ba mar sien ïohi ïa katei ka ding ba ka la klang, ki la mih ban ïaleh ban tem noh mar-mar ïa katei ka ding da kaba ki la theh da ka um.
La sakhi ruh ba ha katei ka jingjia, ka ding ka la ïoh ban bam duh ïa kawei ka paiñkhana ïing briew kaba don ha syndah jong katei ka khlaw bad la ïohi ruh ba ka la kylla dpei lut.
Na ka liang ki nongshong shnong ki la pyntip ruh mar-mar ïa kane ka jingjia sha ki kali pynlip ding kiba la wan ban pynlip bad tem noh ïa ka jingpur jong ka ding sha kiwei pat ki jaka kiba marjan.
