Shillong, Ïaïong 30
U nongïalam ka Congress uba long ruh u Deputy CEM ka Khasi Hills Autonomous District Council (KHADC), Bah P.N. Syiem ha ka Sngi Ba-ar u la pynpaw ka jingkyrmen skhem ba ka seng kan poi sha ka thong ha kane ka ilekshon ba dang shu dep sha ka Lok Sabha.
“Ka don hi ka jingïaleh, ka Congress ruh ka don hi ka jingkyrmen ban jop, tangba ha ka jingïaleh te ym nud ban ong ba la tikna 100 na ka 100, hynrei ngi don jingkyrmen ban jop,” la ong u Bah Syiem haba kren sha ki lad pathai khubor.
Haba kylli, u la ong ba ka ilekshon MP kam da long than eh kum ka ilekshon MLA, MDC ha kaba bun ki briew ki long jar-jar, wat la u la kubur ba ha kane ka kynti namar ka jingshongshit jong ka VPP kiba bun ki ïa mih sha ki jingïalang.
“Hynrei phin ym tip pat ïa ka jingmut jong ki briew ha ki jaka thep ‘vote’,” u la ong.
U la bynrap, “Nga shu kyrmen ba kiba bun ki nongthep ‘vote’ ba jar-jar kin noh sha ka Congress ha kane ka ilekshon ba la dep.”
Ha kawei ka liang, u Deputy CEM u la ong ba ka Delimitation Committee kaba la shah bynshet kam ha ryngkat ka jingkitkhlieh ban pynbeit ryntih ïa 29 tylli ki konstitwensi jong ka KHADC shen kan sa aiti ïa ka kaiphod haba ïadei bad kane ka liang.
Katkum ka jingïathuh jong u, ka komiti kan sa pyndep ïa ka kam ba la bynshet (ha ka) hapoh ka por ba la buh naba ka la pan ïa ka jingpynjlan por kaba hynriew bnai.
U la ong ruh ba ka Executive Committee kan hap ban ïashong bad khmih bniah halor ka kaiphod shisien ba ka la ïoh pdiang ïa ka na ka komiti.
“Ngin sa pynlong ïa ka Dorbar ban wanrah ïa ka kaiphod bad hadien kane, yn sa phah sha u Lat na bynta ka jingmynjur. Hadien kane, ngin sa pynmih jingpynbna ha ka ‘Official Gazette’ bad ka ilekshon kan sa long,” la ong u Bah Syiem.
Shuh shuh u la bynrap ba ka jingpynlong ïa ka ilekshon kan shong ha ka jingaiti jong ka Delimitation Committee ïa ka kaiphod.
