Shillong, Ïaïong 30
Haduh saw ngut ki briew ki la shah kem noh ha ki shipai khappud ka Border Security Force (BSF) katba ki dang thmu ban khaïi bad shalan be-aiñ ïa ki masi sha Ri Bangladesh.
Katkum ka khubor la ong ba kine ki briew kiba la shah kem ki dei kiba dang thmu ban khaïi be-aiñ ïa ka shini bad masi sha Bangladesh lyngba ka khappud na South West Khasi Hills.
Shuh shuh ka khubor ka la ong ba ki shipai BSF ha ka 29 tarik ki la ïoh kurup haduh 28 tylli masi na ar tylli ki Bolero Pickup katba ki nongkhaïi ki dang thmu khaïi sha Bangladesh. Ïa kine ki kali la ïoh bat na khappud ka South West Khasi Hills bad la ïoh kem ïa saw ngut ba kynthup ïa ar ngut ki nongñiah bad ar ngut ki nongbud.
Haba tohkit, la shem ba kine ki briew kim don satia ïa ki kot ki sla kiba biang ban khaïi ïa ki masi. Kumta ïa kine ki briew la aiti noh sha ki pulit ba kin leh ïa kaba donkam.
Ha kawei pat ka jingkhynra, ki shipai BSF ki la ïoh kurup haduh 16000 kilo ka shini, kaba thmu ban khaïi tuh sha Bangladesh na khappud ka South Garo Hills. Ki BSF ki la kurup ïa kane ka shini na kawei ka sem kaba don hajan khappud.
