Shillong, Ïaïong 30
Ka khubor na ki pulit ha ka Sngi Ba-Ar ka ïathuh ba u Bikash Kumar u la ujor ba ha ka 29 tarik Ïaïong ha ka por kumba 9 baje mynmiet, u la lap ba ki runar ki la leit prong ha ka ïing sah jong u ha Oakland, Shillong bad ki la rah ïa kawei ka TV bad kawei ka Laptop.
Ha kawei pat ka khubor, ka Kong Marbahun Kharkongor ka la ujor ba ha ka 25 tarik Ïaïong, ki runar ki la shoh la dat ïa u bahaïing hasem jong ka, u Donkupar Kahit (34 snem ka rta) ha Smit. Namar ka jingjur ka jingmynsaw, la pynkit noh ïa u sha Supercare Hospital, Shillong.
Shuh shuh ki pulit ki la ïathuh ba ha ka 29 tarik Ïaïong ha ka por kumba 3:40 mynstep, ki pulit ki la bat ïa kawei ka kali Maruti Alto (ML-05AB-3259) ba la ñiah da u Babu Baidya (21 snem ka rta) bad ryngkat bad u, la don sa lai ngut kiwei pat.
Ïa kane ka kali, la ïoh bat ha ïew Ichamati, bad na kane ka kali la lap ïa lai tylli ki Battery trok bad uwei u Hydraulic Jack, bad la suba ba kine ki tiar ki dei kiba la shu tuh da kitei ki briew. Hynrei, na kitei ki saw ngut, ar ngut ki la ïoh lad ban phet na katei ka jaka.
Nalorkata, ki pulit ki la ïathuh ba u Dhaanjay Mahanta u la ujor ba ha ka miet jong ka 27 & 28 tarik Ïaïong, ki runar ki la tuh ïa ka thuk-thuk jong u (ML-05AB-9279) na ka shnong Lyngkhat ha East Khasi Hills.
Ha kawei pat ka jingjia, u Bormi Phawa u la ujor ba ha ka 28 tarik Ïaïong ha ka por kumba 4:15 mynstep, ar ngut ki runar ki la leit rung ha kawei ka jaka ba dang shna ha Lumjingsuk, Block-A, Madanrting, bad ki la tuh ïa ar tylli ki Mobile Phone. Hynrei, u Bormi u la ong ba u la ïoh ban bat noh ïa uwei na kitei ki runar ba la tip kyrteng kum u Mithun Barman.
Na ka liang ki pulit ki la ïathuh ruh ba kawei ka longkmie ka la ujor ba ha ka 28 tarik Ïaïong ha ka por kumba 11:30 mynstep, u kpa nah jong ka, u Leki Phawa (38 snem ka rta), u la dung ïa ka kmie jong ka da ka tari ha ka shnong Wahïajer, West Jaiñtia Hills, bad ka la mynsaw jur.
Shuh shuh ki pulit ki la ong ba u Pynshaiborlang Khonglah u la ujor ba ha ka 26 tarik Ïaïong ha ka por kumba 3:30 nohphai sngi, ki runar ki la tuh ïa ka thuk-thuk jong u (ML-05AA-3254) na ka shnong Bakur, West Jaiñtia Hills.
