Khliehriat, Ïaïong 30
Ka jingwan ther jong u slap bad u phria ryngkat ka jingbeh jur jong ka lyer, ka la wanrah ka jingtwa khyndew bad khyllem ki dieng bah dieng rit ha ki bynta ka surok bah National Highway 6.
Kane ka jingtwa khyndew ka la jia ha ka por kumba 5 baje janmiet eiei jong ka 30 tarik mynta u bnai. Ha kane ka jingjia kam shym don kano-kano ka jingjia kaba sngewsih.
Kane ka jingjia twa khyndew bad khyllem jong ki dieng ka la jia ha Sonapyrdi hajan ka ktem shipai BSF ha kaba ki dieng bah kiba khyllem ki la ban ïa katto-katne tylli ki trok bad julor phom.
Kane ka la wanrah ruh ka jingsahkut ka ïaid ka ïeng jong ki kali lyngba kane ka surok bah.
Ha kajuh hi ka janmiet ka jingbeh jur jong ka lyer ka la wanrah ruh ka jingkhyllem jong ki nar ilektrik ha ka shnong Shnongrim, Nongkhlieh, East Jaiñtia Hills District.
Katkum ka khubor na ki nongshong shnong la ïathuh ba la don 12 tylli ki nar ilektrik kiba khyllem bad ban ruh ïa ki ïing ki sem jong ki nongshong shnong. Ha kane ka jingjia ym shym la don satia kano-kano ka jingjia ba sngewsih.
