Shillong, Ïaïong 30
Ki pulit ki la pynrung ïa ka jingujor jong uwei u samla pyrshah ïa ka samla kaba la kynnoh ba ka shah leh be-ijot bad ka jingtohkit kan ïaid halor ka jingujor jong u kaba ki pulit ki la pynrung katkum ki kyndon jong ka aiñ na ka bynta kiba dang rit rta (minor) kata, ka Protection of Children from Sexual Offences (POCSO) Act nalor ka Indian Penal Code (IPC).
Haba ïakren bad u Superintendent of Police (SP) ka East Khasi Hills district u Rituraj Ravi ha ka Sngi Ba-ar, u la ong ba ka jingtohkit kan ïaid halor ka jingujor ejahar jong uwei u samla uba don ha ka rta kaba dang rit (minor) ha ka por jong ka jingjia ha u snem ba la dep, bad kan ïaid katkum ki kyndon jong ka aiñ na ka bynta kiba dang rit rta bad kane kan leit sha ka Juvenile Justice Board (JJB).
U SP u la ïathuh ba u samla u la ujor ejahar ha Thanat Rynjah pyrshah ïa ka samla ha kaba u la kynnoh ba u shah leh khlemakor ha ka. La pynrung ïa ka ejahar ha ka jingmudui katkum ka aiñ POCSO bad ka jingtohkit kan ïaid halor kane.
Katkum ka aiñ, ka jingtohkit halor kane ka ïaid ha ki ar bynta. Kawei ka dei halor ka jingjia kaba jia naduh u snem ba la dep halor ka jingkynnoh shah leh be-ijot ka samla bad halor ka jingkynnoh jong u samla pyrshah ïa ka. Katkum ki kyndon jong ka aiñ, u samla uba ujor ejahar pyrshah ïa ka samla u la kynnoh ba u shah leh khlemakor ha ka.
Kawei pat ka bynta jong ka jingtohkit ka dei halor ka jingshna bad pynsaphriang ïa ka dur khih (video) kaba pyni ïa ka jingngat jong ka samla ha ka apot shah leh be-ijot ha kaba kiba shah kynnoh kin nym lah ban lait na ka jingtohkit.
Halor ka jingïoh jamin lypa u samla na ka Ïingbishar jong ka Khasi Hills Autonomous District Council (KHADC) ban nym shahkem, ki pulit ki la rah ïa ka jingmudui sha ka Ïingbishar kaba kham shalor namar ka jingïoh jamin ka lah ban long tang halor ka jingkynnoh ba leh khlemakor ka samla ïa u kum uba dang rit rta, hynrei ka jingtohkit kan ïaid lang ïa baroh haba ïadei bad ki kam runar kiba kynthup ïa ka jingshna bad pynphriang ïa ki dur khih kiba ka samla ka la kynnoh ba ka dei ka jingshah leh be-ijot ha ka kynhun jong ki briew.
La ong ba ka jingshna bad pynphriang ïa ki ‘video’ khlemakor ka dei ka kam runar kaba ka aiñ kan bud nadien ïa kito kiba donkti ban leh ïa kane ka kam bymman bad kaba la kynnoh ruh ba ka dei ka jingleh be-ijot kynhun (gangrape) ïa ka samla.
Kum ban pynkynmaw, kawei ka samla ka la kynnoh ba ka don ka jingleh be-ijot da ka kynhun (gangrape) ïa ka ha u snem ba la dep. Kumta ka la ujor ejahar dang ha kine ki khyndiat sngi hadien ba la saphriang ki dur khih khlemakor pyrshah ïa ka ha social media.
Ka samla ka la kynnoh ba kane ka jingjia leh khlemakor ïa ka, ka jia ha kawei ka ïing ha nongbah Shillong ha u Nailur ne Risaw 2023.
