Shillong, Jylliew 12
Da ka jingïatreilang hapdeng ki nongtrei ka tnad ka koit ka khiah bad ki nongshong shnong, la lah ban pynpoi suk ïa kawei ka longkmie kaba armet sha Kherapara Primary Health Centre (PHC), West Garo Hills District, kaba la wanrah pat sha ka jingkha-suk jingkha-saiñ jong ka ïa la i khun kynthei.
Katkum ka jingïathuh ki ophisar ka tnad ka koit ka khiah, kane ka longkmie kadei kaba dang kha khun nyngkong na ka shnong kaba jngai bad bym don surok bad ka la kyntait ban leit kha ha ka jaka sumar paidbah.
Ynda la ïoh jingtip ba ka la suh kha, ka kynhun ki nongsumar ba kynthup ïa ka ANM, Mery-bell B. Marak, ka Mid-Level Health Provider (MLHP), Ritngenlang M. Umlong bad ka Health Supervisor, Lilysa Ch.Sangma, ki la leit mar-mar sha katei ka shnong, ban ai jingïarap.
Haba ki la peit bniah ïa ka jinglong jingman jong ka longkmie, ki la lap ba kam lah shuh ban pyrshang ban kha hi bad ka donkam ban rah kyrkieh sha ka jaka sumar na ka bynta ka jingshngaiñ jong ka bad i khun.
Da ka jingïarap ki nongshong shnong, la rah ïa ka longkmie da ka krong ba la shna na ki siej bad ki dieng, lyngba ki lynti kiba eh haduh ban poi sha ka jaka kaba lah ban lait kali, kata haduh 10 KM.
Nangta, la kit noh ïa ka sha Kherapara PHC, ha kaba ka la kha suk ïa i khun kynthei iba koit ba khiah, iba don ka jingkhia haduh 3.3 kilo.
Ki ophisar ki la pyntip, ba ka kmie bad i khyllung ki don ha ka met kaba koit ba khiah haduh mynta.
Kane ka jingjia ka pynpaw ïa ka bynta kaba kongsan jong ki nongtrei ka koit ka khiah ha ki jaka nongkyndong bad ka jingïatreilang jong ki paidbah ban pynthikna, ba ki longkmie ki ïoh ïa ka jingsumar kaba biang ha ka por kaba donkam.
La ai jingïaroh ïa ki nongtrei ka koit ka khiah bad ki nongshong shnong, kiba la shim bynta ban ïarap, kaba la pynurlong ïa ka jingkha khun kaba shngaiñ bad jop.
