Shillong, Jylliew 12
U Myntri ka Sorkar Pdeng u ba peit ïa ka tnad Ports, Shipping & Waterways, u Santanu Thakur ha ka Sngi Thohdieng u la pynpaw ka jingsngewskhem ba ka Bharatiya Janata Party kan pynkhlaiñ ïa ka jingdon jong ka ha Meghalaya bad u la kdew ba ka jingtlot ka party ha kine ki sngi ba la dep ka dei na ka daw ka jinglong jong ki jaka bad ka jingbym lah ban pynsngewthuh sha ki paidbah ïa ki kam ba bha jong ka party.
Haba ïanujor ïa ka Jylla Meghalaya bad ka Jylla West Bengal, u Thakur u la ong ba ka jinglong ki jaka ka dei kawei ka bynta ba kongsan ban pynkhlaiñ ïa ka saiñ pyrthei lane ka party, u la ong “Ka West Bengal ka dei kaba bun ki jaka ba long madan, kumta ka kham suk ban ïaid kylleng-kylleng bad ban pyntip ïa ki kam ba bha jong ka Sorkar u Modi sha ki paidbah. Dei na kata ka daw ba ka BJP ka la lah ban thaw ïa ka Sorkar ha katei ka Jylla.”
U la ong ba ka Jylla Meghalaya ka long kaba kham jynjar ha ka jinglong jingman ki jaka bad kaba kham buh jingeh ïa ki nongtrei ka party ban ïaid ïa ki jaka bad na kata ka daw ka buh jingeh ïa ka party ban pynïajan ïa ki paidbah.
U la ong, ban ïoh ïa ka jingjop ha ki ilekshon ka shim por ha man la ki Jylla. Hynrei u la pynpaw ïa ka jingsngewskhem ba ka BJP ha ka Jylla Meghalaya kan sa lah ban leh bha ha ki por ban dang wan.
U Thakur u la ong ba ha kine ki sngi ki briew ki la sdang ban sngewthuh ïa ki kam ba bha jong ka Sorkar u Modi bad ynda ki la ïohi ïa ki jingmyntoi, da ka jingsngew jong ki hi kin sa wan ban pynïasoh bad ban kyrshan ïa ka BJP. U la ïathuh ba ka party ka dang ïai trei ban pynsngewthuh ïa ki paidbah bad ïa ki jingeh jong ki paidbah ka party kan sa pynbeit.
Shuh-shuh u la ong ba ki nongtrei jong ka party ki long kum ki shabi ban tei ïa ka jingai jingkyrshan jong ki paidbah. “Ki nongtrei jong ngi ki trei shitom bha naduh ki shnong ki thaw ban pynkhlaiñ ïa ka party. Ka por jong ka BJP kan wan ha Meghalaya, kumba ka la jia ha West Bengal hadien ba ki briew ki la sdang ban shaniah ïa ka Sorkar NDA,” la ong u Thakur.
Haba pynkut u la ong ba ki nongtrei jong ka BJP ki trei ha man la ki bynta, ha man la ki kyrdan jong ka Ri bad lada ka Meghalaya ka ïoh haba ïadei bad ki kam pynroi, ka party kan ïoh ban thaw ïa ka Sorkar, u la bynrap ba ka jingtlot ka party ha Meghalaya kam dei ka jingtlot jong ki nongtrei, hynrei ka dei na ka daw ka jingbym ïa sngewthuh bha ha ka kren ka khana bad ka jingbym lah bha ban pynsngewthuh ïa ki paidbah.
