Shillong, Jylliew 12
Ka Meghalaya Commercial Truck Owners and Drivers Association (MCTODA) ka la shim da kawei ka rai ban phah da ka jingthoh sha KHADC bad JHADC haba ïadei ka jingwan rung laitlan ki trok ba nabar ha ki thaiñ Dawki bad Majai.
Ha ka jingïalang ba la long ha ka Sngi Thohdieng ha Hollywood hall Laitkor la wan ban ïashim bynta da ki trai bad ki nongñiah trok ba na kylleng ka Ri Khasi bad Jaiñtia kiba la pynsngew ha la ki jong ki jong ki jingeh kiba ki ïakynduh.
Haba kren sha ki nongthoh khubor u nongaiktien ka MCTODA u Bah Wanshuwa Nongtdu u la ïathuh ba ki jingeh ba ki nongñiah trok ki la pynpaw ha ki nongïalam jong ka Association ka long haba ïadei ka jingbymdon ki jaka pynïeng kali ha shi lynter jong ki surok, kaba pynlong ïa ki nongñiah trok ba kim ïoh shuh ban shong jahthait ha ki surok, da kaba kdew ba ka dei ka kam jong ka NHIDCL ban shna ïa kiba kum kine kaba long katkum ka Detail Project Report.
Shuh-shuh u la ong ruh ba na ka liang ka Association kan leit ban ïakynduh ïa ki bor ba dei peit bad lada kim sngap bad kim leh eiei halor ka jingpynsngew jong ki na ka liang ki nongñiah trok kim banse ban mih sha surok.
U la pynpaw ruh ba ka Association ka ai ka jingkyrshan ïa ka jingkhynra jong ka Khasi Students’ Union bad ka Federation of Khasi Jaiñtia and Garo People dang ha kine ki sngi ba la dep haba ïadei ka jingwan rung laitlan ki trok ba nabar hapoh ka Jylla.
Kum ban shu kdew, ha ka 10 tarik u Jylliew 2026 ka KSU bad FKJGP ha ka jingleit ban khynra ïa ki trok ba wan rung laitlan hapoh ka Jylla bad khlem ki kot ki sla kiba biang, ki la ïoh ban bat haduh palat 200 tylli ki trok ban wan rung be-aiñ ha ka thaiñ.
