Shillong, Jymmang 01
Ka jingïalang hapdeng ki bor district ka East Khasi Hills bad Defence Estate Office na Guwahati ka la rai ban thaw da ka Joint Committee ban peit ban khmih ïa ka jinglong-jingman jong ka jaka ha Lum Survey. Ha kane ka Joint Committee yn donlang ki briew na ka shlem treikam u Deputy Commissioner East Khasi Hills, Defence Estate Office, Pulit bad Municipal Board.
Ïa kane ka rai la shim ha ka jingïalang kaba la long hapdeng u Deputy Commissioner ka East Khasi Hills district bad Defence Estate Office ban ïakren halor ka jaka kaba don ha Lum Survey kaba la kynnoh ba ki don kiba wan sah beaiñ bad ha kane ka jaka la jyllei ki kam sniew kynthup ka jingdie ïa u drok bad kiwei kiwei ki kam runar.
Ka Joint Committee kan sa leit jurip ruh ïa kane ka jaka ha kine ki sngi ban tip kham bha ïa ka long ka man khamtam namar ka don ka jingïathuh ba ki ju jia ki kam beaiñ ha kane ka jaka na ka por sha ka por.
Haba ïakren bad ki nongthoh khubor, u Deputy Commissioner ka East Khasi Hills district, u SC Sadhu, u la ong ba kane ka jaka ka dei kaba ka Ïingbishar ka la ai ïa ka rai kaba pynksan ïa ka Defence Estate Office, Guwahati ha u snem 2016 haba ïadei bad mukotduma long trai ïa ka jaka (title suit). Hynrei ka Ïingbishar ka la pynsangeh shwa ban kyndang noh ïa kiba sah hapoh u pud jong kane jaka da kaba ong ïa ka Defence Estate Office ban bud bha ïa ki kyndon jong ka aiñ. Kumta u la ong ba kane ka mukotduma mynta ka dang don ha Ïingbishar ban bishar haba ïadei bad ka bynta ban kyndang ïa kiba sah ha kane ka jaka.
Kumta ka Ïingbishar kan shim ban bishar ïa kane ka kam ha ka 27 tarik mynta u Jymmang ha kaba ka Defence Estate Office ruh kan ai ki jubab sha ka Ïingbishar.
Na ka liang ka Defence Estate Office ruh kan phah ka kynja kaiphod kaba batai bniah shaphang kane ka jaka bad la khmih lynti ba ha kine ki shi sngi ar sngi kin sa phah noh sha DC Office, East Khasi Hills district.
U DC u la ong ba ha ka jingïalang la ïakren ruh shaphang ka jinglong-jingman ka suk ka saiñ ha kane ka jaka namar la ïoh jingtip ba ki ju don ki kam sniew ha kane ka jaka ha kaba la pan ruh ïa ka kaiphod na u SP ka East Khasi Hills haba ïadei bad ka jinglong-jingman ha kane ka jaka khnang ban lah leh eiei katkum ka aiñ lada lap shisha ba ki don ki kam beaiñ ha kane ka jaka.
