Nongpoh, Jymmang 01
Uwei u samla na ka shnong Mawlai Nongkwar bad uba la shongkha mynta ha ka shnong Ïewmawlong, Ri-Bhoi District, u la pyntip ba ha ka step jong ka 29 tarik u bnai ba la dep ha ka por kumba 5 baje mynstep, u la shah lute ha ki khynnah dih drok ha ka thaiñ Khyndailad (Police Bazaar) ha nongbah Shillong.
Utei u samla ba la tip kyrteng kum u Shanbor Wahlang, u la ïathuh ba namar ka jingwan beh kam bad khlem ïoh ban thiah baroh shi miet, kumta u la kum leit khmat hapoh ka kali kumba katto-katne minit. Dei ha kata ka por ba ki khynnah dih drok kiba don da ka kynhun, ki la ïoh ban rung bad kloh beit ïa ka pla pisa jong u kaba don kumba T.70,000.
U la ïathuh ruh ba wat hapdeng ka jingshoh samthiah, u la pyrshang ban ïakhun ïa kitei ki runar kiba don kumba lai-saw ngut eiei bad ïathuh ba ka pisa kaba ki la ïoh ban tuh na u, ki la ïaleh ban ai tuh na uwei sha uwei pat khnang ban ym lap dien ïa ka.
U la ïathuh ruh ba ha ka jingpyrshang buddien ka jong u, u la ïoh ban bat ïa uwei na kitei ki runar ba donkti, hynrei ka la don kawei pat ka longkmie bar Jylla kaba leh myn die ‘waidong hangta kaba la ïarap ïa uta u runar bad hapdeng kata ka jingïania bad kata ka longkmie, uta u runar u la ïoh ban phet krad noh ïalade.
Utei u samla u la ong ruh kaba sngewsih ka long ba ki pulit ka thanat Sadar kim shym la shimkhia satia ïa kata ka jingleit ujor jong u, ha kaba u pulit uba don ha ka kam ha kata ka step ruh wat hadien ba u la ïathuh ba um dei satia uba nang ban thoh ban tar, hynrei uta u pulit u khlem ïarap satia ïa u bad ïathuh ba la shu bthah ïa u ban leit noh sha ïing bad ba na ka liang ki bor pulit kin sa pyntip pat ïa u.
Namar ka jingshitom bad mynsaw na ka jingïashoh bad kita ki nonglute, u la ong ba um lah shuh ban leit mih biang ha ka sngi kaba bud bad nalor ba ki bor pulit kim shimkhia satia, kumta u ong ba um kwah ruh ban leit ujor ejahar wat lada u tip tyngkreiñ ba kata ka longkmie bar jylla kaba ïarap ïa kita ki runar, ka dei kaba donkti lang.
Shuh shuh u la buh jingkylli ba kumno kat katei ka jingjia hapdeng ka sor Khyndailad, kita ki CCTV kim ïoh ringdur satia ïa kita ki nonglute bar jylla, da kaba kynnoh ba kita ki CCTV ki ringdur tang ïa ki Khasi, katba ïa ki barjylla kim ring dur satia haba don kino-kino ki jingjia.
Halor kane ka jingjia, une u samla u buh ka jingkyntu ïa kiwei pat ki paidbah ba ki dei ban long husiar bha ïalade namar ka jingjyllei jong ki khynnah dih drok kiba lute im-im peit-peit ïa ki briew khlem jingsalia khamtam ha ki thaiñ Khyndailad.
