Nongstoiñ, Jymmang 01
Na ka daw jong ka ilekshon sha Lok Sabha, 2024 ka ban sa long ha Assam, u Deputy Commissioner (Excise) ka West Khasi Hills District, Nongstoiñ, u Bah Garod L.S.N. Dykes IAS, katkum ka bor ba la pynkup ha u hapoh ka kyndon 324-A jong ka M.E. Act, 1945 (Assam Excise Acts, 1945 as adapted by Meghalaya) bad ruh katkum ka Government Order No.ERTS(E)10/2013/175-A, Dt. 23.04.2024, u la pynbna sngi tyrkhong kyiad hapoh ka West Khasi Hills District.
Ha ka kyrwoh khubor, u DC u la ong ba kane kan trei kam naduh ka 04:00 baje janmiet jong ka 5 tarik u Jymmang, 2024 haduh ban da kut ka jingthep ‘vote’ ha ka 7 tarik u Jymmang, 2024 namar ba ka dei ka distrik kaba markhap bad ka Assam.
Shuh shuh u DC u la bthah ïa baroh ki dukan die kyiad pyrsi bad IMFL, ki bar, Hotel, Bonded Warehouse ba kin khang khyrdep ïa la ki dukan ha katei ka sngi.
Lada lap ïa kiba leh pyrshah yn pynshitom ïa ki hapoh ki kyndon aiñ.
