Shillong, Jymmang 01
Kumba ju long man la u snem, ka Meghalaya Joint Council of Trade Unions and Associations (MJCTU&A), Shillong ka la pynlong ïa ka sngi rakhe jong ki nongtrei lane ‘Workers Day’ ha ka Sngi Balang bad ïa kane la ju pynlong ha ka 1 tarik u Jymmang kaba tip ruh kum ka ‘May Day.’
Ka May Day ka dei ka sngi ban kynmaw ïa ka jingnoh synñiang jong ki nongtrei ha ki bynta bapher-bapher bad ha kajuh ka por ka jingïakhun ban dawa ïa ki hok jong ki nongtrei kaba dei ban lang mar katjuh ïa baroh. Ka May Day ka dei ruh ka sngi ba ki nongtrei ki ju dawa ïa ki hok jong ki bad ka jingkynmaw burom ruh ïa ki nongïalam kiba la pynïoh ïa ka hok ban trei tang 8 kynta shisngi.
Ha kane ka jingïalang kaba lyngkot kaba la pynlong ha jaka pynïeng kali jong ka Additional Secretariat, la ïoh katto katne ki jingkren ba kynthup ba u General Secretary ka Meghalaya Joint Council of Trade Unions and Associations, Shillong u Bah Edward Lynshing, u President ka Union u JL Das nalor kiwei kiwei.
Ka Meghalaya Joint Council of Trade Unions and Associations, Shillong ka dei ka kynhun jong ki nongtrei kaba la ju pynsngew ruh ïa ki jingeh kum ka jingkiew dor ki mar ki mata, ka jingpynïoh baibam ïa baroh, ka jingpynkiew ïa ka bai bylla jong baroh ki nongtrei bylla sngi bad ka jingshngaiñ na ka bynta jong ki, nalor ka jingdawa ban weng noh ïa ki aiñ kiba long pyrshah ïa ki nongtrei bad kiwei kiwei ki mat. Kum ban pynkynmaw, ka jingrakhe kaba nyngkong eh ïa ka May Day ha India la pynlong ha ka 1 tarik u Jymmang, 1923 ha Chennai kaba la pynbeit da ka Labour Kisan Party of Hindustan.
