Khliehriat, Jymmang 01
Ka Khasi Students’ Union (KSU) East Jaiñtia Hills District Unit ha ka 1 tarik Jymmang ka la pan jingshai na u DC ka distrik halor ka mat ban pynkynriah ïa ki shipai BSF na Sonapyrdi ba haduh katno la ïaid ka jingïakren hadien ba u DC u la khot ïakren ïa ki shipai BSF ha ka 30 tarik Ïaïong.
Ka jingkhot ïakren u DC ïa ki shipai BSF ka dei hadien ba na ka liang ka KSU ryngkat ka shnong Sonapyrdi lem bad ki paidbah na ka thaiñ Huroi, Hingaria, Lejri, Myrli bad kiwei-kiwei ki la ïeng pyrshah halor ka jingdon ka ktem BSF hapoh ka shnong Sonapyrdi.
Ka KSU ha ka kyrwoh ka la ong ba na ka liang u DC u la pyntip ba hapoh kine ki sngi ba wan, un sa pynmih ïa ka hukum ban pynkynriah noh ïa ki shipai BSF mar-mar na katei ka jaka.
Ka seng ka suba ruh ba ka lah ban don ka jingbym kohnguh ïa ka hukum na u DC ynda la pynmih hynrei ka seng ka la kyntu ba ïa kane ka mat ym tang ban shu pynsngewbha ïano-ïano da kaba shim rai kyrkieh hynrei dei ban ïakren haduh ba kan urlong syndon.
Ka seng ka maham ruh ban mih paidbah biang lada jia ba kine ki BSF kim treh ban kynriah bad lada ki ïai bteng ban leh ïa ki kam leh ba-heh bad ktah kti ïa u paidbah.
Shuh shuh ka KSU ka pynkynmaw ba ka la ïaid lynti ïa kane ka mat ban dawa kynriah ïa ki shipai BSF la jan 6 snem mynta bad ka la pynsngew ruh shaduh ka miej jong u Myntri ba dei peit ïa ka kam pohïing, Bah Prestone Tynsong hynrei khlem don kano-kano ka jubab na ka Sorkar halor kane ka bynta. Ka jingdawa jong ka KSU ka long ba ym dei ban ïohi shuh ïa ki BSF ha Sonapyrdi kumjuh ha Dona Umbluh hajan Ratacherra.
