Khliehriat, Jymmang 01
Ki pulit ka East Jaiñtia Hills ha ka 30 tarik u Ïaïong 2024 ki la ïoh ban kurup ïa u drok ‘heroin’ uba shongdor kumba T.2.1 klur hadien ka jingpynap shrip ha Ratacherra, East Jaiñtia Hills, bad kem noh ïa u briew uba donkti.
U Superintendent of Police, East Jaiñtia Hills, u Giri Prasad M, IPS lyngba ka kyrwoh u la ong ba kane ka jingïoh kurup ka la wan hadien ba ki bor pulit ha katei ka sngi ki la pynlong ka jingap shrip ha ki bynta jong ka Ratacherra Infiltration Check Post hadien ba ha ka por kumba 10 baje mynmiet ki la pynïeng ïa kawei ka Night Super Bus MTC kaba don ïa u nombor ML-03-0216 na ka bynta ban pynlong ïa ka jingtalasi.
Ha kane ka jingtalasi, ki pulit ki la ïoh kurup ïa u drok ‘heroin’ ba la buhrieh hapoh 25 tylli ki synduk sabon na uwei u briew uba la tip kyrteng kum u Mizazur Rahman uba dei na Silchar, Assam.
Nalor kata, ki pulit ki la ïoh ruh ban kurup haduh 3720 tylli ki dawai kuli Nitrazepam Tablets bad kawei ka ‘mobile phone’.
Kum ban shu pynkynmaw, ha ka 27 tarik Ïaïong, ki pulit ki la ïoh kurup ïa u drok ‘heroin’ uba shongdor T.7.2 Klur ha ka ïew ka pyrthei.
Ïa une u drok la kurup na ka Mahindra Pick-up trok ha Ratacherra. Une u drok u khia 900 gram bad u shongdor T.7.2 klur.
Halor kane, ki pulit ki la kem ïa u Nehtinmang Haokip, 36 snem ka rta, uba ha ka jingtohkit u la phla ba u la wanrah ïa une u jingdih pynbuaid na Churachandpur, Manipur da ka jingthmu ban pynpoi sha ka nongbah Shillong.
