Mairang, Jymmang 03
Ha kawei ka jingjia, u paidbhur ha kawei ka shnong ha Eastern West Khasi Hills u la bom la tied ïa arngut ki briew hadien ba la kynnoh ba ki la pyrshang ban batbor ïa kawei ka khynnah, bad kine baroh ar ki la khlad.
Kane ka la jia ha ka Sngi Thohdieng. Kitei kiba la shah bom ha u paidbhur ki dei na ka thaiñ Shyrwang bad ki dei ruh kiba la wan bylla ha katei ka shnong ba ki la shah bom shah tied.
Katkum ka khubor ba la ïohlum, la ïathuh ba ha katei ka jingjia shah bom shnong, uwei u la khlad hashen bad uwei uba la mynsaw jur u la khlad noh ha lynti hashwa ban poi ha Civil Hospital ha Shillong ban ai jingsumar. Kiba la khlad ki dei kiba la ithuh kyrteng kum u Mewal Kurbah uba la don kumba 36 snem eiei ha ka rta bad uba la khlad hashen bad u Harmindra Kharkylliang uba la don kumba 50 snem kyrta uba la khlad katba dang pynkit ia u sha Civil Hospital, Shillong.
Katkum ka jingïathuh jong u Sordar jong ka shnong kaba la don ka jingjia, la ong ba na ka liang jong u, u la ïoh ïa ka jingtip halor katei ka jingjia ha ka por kumba 1:30 mynsngi hadien ba la don ki para shnong kiba la ‘phone’ ïa u ha kaba ki la pyntip ba ki la ïoh kem ïa uwei u briew uba la thmu ban batbor ïa kawei ka khynnah.
U Sordar u la ong ba namar u don kham pajih na ka shnong, u la leit mar-mar sha shnong, bad ha ka por ba u la poi ha katei ka ïing jong katei ka khynnah, u la lap ba ki paidbah ki la bat ïa uta u briew.
Hadien kata, ki paidbah ki la ïa ong ban rah noh sha ka ïing jong ka Dorbar Shnong ban pynlong ïa ka jingtohkit bad ban teh lakam ïa u paidbhur khnang ban lait na kano-kano ka jingjia ba sngewsih. Hynrei kam shym la long kumta namar ym shym la lah shuh ban teh lakam ïa u paidbhur.
Nalor nangta, u la ong ruh ba katkum ka jingïathuh, la don sa uwei uba la wan treilang bad kitei ki arngut kiwei pat, bad katkum ka jingtip ka jong u Sordar, baroh arngut ki dei kiba la wan bylla ha shnong. U la ong ba kitei arngut ki dei na ka thaiñ Shyrwang.
U Sordar u la ong ruh ba katkum ka jingïathuh jong utei uba la wan treilang, kitei ki arngut, mar ïa dep bam ja, ki la ïa mih na ka jaka bylla bad ki la leit ban shim kyiad na ka dong Laitarted kaba dei ka shnong kaba marjan.
Hadien ba ki la wan phai, ki la leit ban rung ha kawei ka ïing kaba don katei ka khynnah namar ba ym don briew ha ïing bad ki la thmu ban batbor bad la pynap ruh da ka tari na ryndang jong ka, ha kaba u ryndang jong ka ruh u don ïa ka dak.
U Sordar u la ong ruh ba katkum ka jingïathuh ki nongshong shnong, ki la don ki khynnah shnong kiba la ïohi bad ki la ïoh ban pyllait ïa katei ka khynnah bad ha kajuh ka por, ki la ïoh bat ïa kitei ki arngut.
Hadien kane, na ka liang ka shnong ka la rah noh sha ka ïing shnong lane Dorbar Hall. Tangba namar ka jingbun ki paidbah kiba la wan ym tang na katei ka shnong, hynrei wat na ki shnong kiba marjan, ym shym la lah shuh ban teh lakam ïa ka jingbitar jong ki.
U la ïathuh ruh ba ïa kitei ki arngut la rah noh sha Dorbar Hall ha ka por kumba 2:30 nohphai sngi, bad ha ka jingshisha, na ka liang ka Executive Committee jong ka Dorbar Shnong ka la pyrshang ban teh lakam ïa ki paidbah. Hynrei u paidbhur u la ïaleh kumno ban ïoh rung shapoh jong ka Dorbar Hall. Ha kata ka jingbishar ka shnong, la ai jingtip ruh sha ki pulit ba kin wan ïarap lem namar ki la sngewthuh ba kin ym lah shuh ban teh lakam ïa u paidbhur.
Shuh shuh u Sordar u la ïathuh ruh hadien ba ki pulit ki la poi bad katba ki bor jong ka shnong ki dang ïakren bad ki pulit, u paidbhur u la tur bad ki la khang pyrshah ïa ki pulit ba kin wan shajan. Dei ha kane ka por ba katba ka jingïakren ka dang ïaid bad ki pulit, ki la don kiba kyrdem ïa ka jingkhang jong ka Dorbar Hall bad ki la ïoh lad ban tied ban bom ïa kitei ki arngut.
U Sordar u la ong ruh ba ha ka jingbishar jong ka shnong, na ka liang jong kata ka khynnah ka la ïathuh ba ka la ithuh ïa kitei ki arngut ki briew wat la ki la kah ïa ka dur khmat jong ki da ki jaiñ. Hynrei katei ka khynnah ka la ong ba ka la ithuh na ki tupia ba ki la phong bad ka jaiñ kaba ki la pyndonkam ban kah dur khmat. Wat la katta, u Sordar u la ong ba na ka liang ka shnong ka khlem kwah ban leh ïa kano-kano ka kam pyrshah ïa kitei ki arngut, hynrei la pyntip sha ki bor jong ka aiñ.
Hynrei u la ong ba kitei ki arngut kiba la shah bat ki khlem phla eiei hakhmat ki bor jong ka shnong.
Nalorkata, u Sordar u la ong ba ka jingrah ïa kitei ki arngut sha Dorbar Hall ka long ban teh lakam ïa ki paidbah. Hynrei namar ka jingbun palat jong ki briew, ym shym la lah ban leh eiei shuh.
Haba ïakren bad ki pulit ka Eastern West Khasi Hills, la ong ba u paidbhur u la don kumba 600 ngut eiei ha katei ka jaka. Nalorkata ki la ong ba ki la ïoh jingtip dier por halor katei ka jingjia, kata, hadien kumba 2 kynta tam eiei. Kat ban da poi ki pulit ha katei ka shnong ha ka por kumba 5 baje janmiet eiei, ki pulit ki khlem lah ban leh eiei shuh. Ha kajuh ka por ki pulit ki la ong ba kin sa pynrung hi da ka jingujor halor katei ka jingjia lada jia ba wat ki bahaïing hasem jong kitei kiba shah bom kim treh ban ai jingujor.
