Mairang, Jymmang 03
Ka kmie jong ka khynnah kaba la shah pynap tari ha ki arngut ki briew ha kawei ka shnong ha Eastern West Khasi Hills bad kiba la shah kynnoh ba ki la thmu batbor ïa ka khun, ka la ïathuh ba ha ka por mynsngi jong ka Sngi Thohdieng katba ka dang shong ha jingthiah bad bam kwai, kynsan la don kiba wan ban plie ïa ka pyrda ha kaba ka mut ba dei ki khun kiba wan.
Hynrei ka kmie ka la ïathuh ba ka la ïohi tang ïa ka kti bad ka la thlep khlem tip briew shuh wat haduh ynda la wan ki para shnong ha ïing.
Ka la ïathuh ruh ba ka dei ka khun jong ka hi kaba la kyndit nyngkong kaba la pyrta briew ha kaba ki paidbah ki la ïa mih ban leit thwet ïa kita ki briew. Ka la ïathuh ruh ba ka jingmut jong kita ki briew ban ot na ryndang ka long ba ki mut ban pynïap ïa ka khun jong ka.
Shuh shuh ka la ong ba lada kam wan ka khun jong ka, kita ki ar ngut ki la dep leh bor shwa ïa ka. Hynrei da ka jingwan rung noh ka khun ba ki sa poi pynap ïa ka khun da ka tari na ryndang katba ha kata ka por, ma ka, ka la don hapdeng ka jingbym tip briew.
Nalorkata, ka la ong ruh ba hadien ba la ïoh kem bad wanrah ïa kita ki ar ngut ha ïing ban pynithuh hakhmat jong ka khun, ka la ong ba na ka liang ka khun jong ka kam pat lah ban pynithuh namar ba ki dang at ki khmat ha kaba ka la ïathuh ba kita ar ngut kim shym la ong ba ki khlem wan rung sha ïing ne ban ïasaid, hynrei ki la shu sngap mynthi bad kim shym la jubab wat shi kyntien ruh.
