Shillong, Jymmang 03
Ka Voice of the People Party (VPP) ka la ong ba ka jinglong-jingman ha ka shong suk shong shngaiñ ha kine ki sngi ka dei namar ka jingbymhun jong ki paidbah haba ïadei bad ka synshar-khadar.
“Haba ïakren halor ka shong suk shong saiñ, nyngkong hi haba don ka jingbymhun ha u paidbah, haba don ka jingleh bor, kum kine ki jia beit. Haba ka don ka jingbymhun ha ki briew, ka jingbym biang ha ka imlang-sahlang, ka kham mad bunsien ïa ka jingbym biang ha ka shong suk shong saiñ,” la ong u nongaiktien ka VPP, Dr. Batskhem Myrboh ha ka Sngi Thohdieng.
U la ong ruh ba haba phai sha ka Jylla ha kine ki snem kiba la leit, ki briew ki don ka jingmut ha ki ba kane ka Sorkar kam dei ka Sorkar kaba synshar na bynta u paidbah, hynrei na bynta ki briew kiba ïadei kam beit tang bad ka Sorkar.
“Kane ka Sorkar ne kiba don ha ka Sorkar ki leh jubor, kim dei ki briew kiba don kata ka jingngeit ha ka synshar kaba da ka aiñ, hynrei ka synshar da ka bor,” u la ong.
Ha kajuh ka por, haba ai nuksa halor ka jingshah pynïap u nongïalam barim ka HNLC, Bah Cherishstarfied Thangkhiew, u Dr. Myrboh u la ong ba haba ïadei bad kane, ki la mih shibun ki kynrum-kynram kaba ka Sorkar haduh mynta kam lah ban wanrah jingshai sha ki paidbah.
Halor ka jingïakhih ha Them Ïew Mawlong, u la ong, “Kam dei kaba la mih na ka jingïapher jaidbynriew, hynrei ka mih namar ka jingbym biang ha ka synshar-khadar ban tehlakam ïa ki kam sniew.”
Haba kdew ba ki briew ki peit ïa kito kiba don ha ka bor kum ki bym burom ïa ka aiñ, u la ong kane ha kawei ka liang ka wanrah ïa ka jingsngewdom, jingsngewdiaw, ka jingdukha mynsiem haba ïohi ba kiba don ha ka bor kim dei ki briew kiba long kum ka nuksa ha ka imlang-sahlang.
Kumjuh haba pynkynmaw ïa ka jingjia halor ka jingshah pynïap u dkhot ka KSU ha Ichamati, u la ong, “Ngam tip kumno kane ka Sorkar ka shim ïa kato ka kam. Na kane, ka mih ka jingsngew ha ki briew ba ka Sorkar kam lah ban tehlakam ïa ki briew kiba donkti ha katei ka kam pynïap. Phin lap ba ka don ruh ka jingkren pyrshah ïa ki Khasi kaba la pynmih lyngba ka dur khih…ïa uto kim lah ban kem. Ha kawei ka liang pat, lada jia ba shah kynnoh ba dei ki Khasi, ki lap wut-wut, hangne pat ka wanrah ïa ka jingsuba.”
Na ka liang u nongaiktien ka VPP, u la ban jur halor ka jingdonkam ka tnad pulit ban trei ha kata ka dur ba ki paidbah kin sngew ba kane ka dei ka tnad treikam ka Sorkar kaba don ïa ka jingbym shah liang.
Haba ong ba ka jingsngew jong ki paidbah ka long kaba donkam eh, u la ong ba ka Sorkar ka dei ban pyntikna ba ki briew kin ym don ïa ka rukom pyrkhat ba kane ka Sorkar ka long kaba noh shiliang, kaba leh shiliang, bad ka bym lah ban wanrah ïa ka shong suk shong shngaiñ.
Shuh shuh u la bynrap, “Phi i ki briew ki la peit sniew ïa ka Sorkar. Kaba donkam ïa ka Sorkar ka long ba ka dei ban ïoh ïa ka jingshaniah jong ki paidbah. Ban wanrah hi ïa ka shong suk shong shngaiñ ka long ba ki briew kin shaniah ïa ka Sorkar bad ban ïoh ka jingshaniah, ka Sorkar kan hap pyni da ki kam khnang ban lait na kine ki kynrum-kynram.
