Shillong, Jymmang 03
Ka tnat Social Welfare ka Sorkar Jylla ka la pynksan ïa ka aiñ Khasi Hills Autonomous District (Khasi Social Custom of Lineage) Act 1997 da kaba pyndam noh ïa ka shithi kaba la pynmih ha ka 21 tarik u Naitung, 2020 kaba la batai bakla da kaba ong ba ka Lineage Act kam khang ban ai syrnot Scheduled Tribe (ST) ïa kito kiba shim jait na u kpa ne ka kmie bad kiba shim ïa ka jait jong u tnga lada ka tnga bym dei Khasi.
Haba kren sha ki lad pathai khubor ha ka Sngi Thohdieng, u Myntri ka tnat Social Welfare u Bah Paul Lyngdoh u la ong ba ka jingïalang kaba la long ha ka 28 tarik Rymphang, 2028 ka la ïakren halor katei ka shithi kaba la phah lyngba u ophisar ka tnat Social Welfare sha ki Deputy Commissioner ka Shillong bad Nongstoiñ halor ka jingpyrshah ka KHADC bad ka Hynñiewtrep Youths’ Council ïa kaei kaba long pyrshah ïa ka Khasi Hills Autonomous District (Khasi Social Custom of Lineage) Act 1997.
Kumta u Bah Paul u la ong ba ha ka jingïalang la shim ïa ka rai da kawei ka sur ba kata ka shithi kaba pynmih da ka tnat Social Welfare ha ka 21 tarik u Naitung, 2020 dei ban pyndam ne weng noh shisyndon namar ba kumno ka shithi kan long kham halor ïa ka aiñ kaba la dep ban mynjur da ka Ïingdorbar Thawaiñ ka KHADC bad ruh kaba la dep mynjur da u Lat ka Jylla.
Shuh shuh u Bah Paul u la ong ba ha katei ka jingïalang la ïakren ruh ïa ki kyndon haba ïadei bad ka jingai syrnot SC/ST katkum ka Office Memorandum (OM) kaba 19 tarik u Lber, 2014 ha kaba la pynpaw ba ïa kane ka OM donkam ban pynkylla da kaba pynrung ïa kine ki kyntien da kaba pynrung ïa ka kyndon kaba ong, ban ïoh ïa ka syrnot, donkam shwa ban ïaid lyngba ki bor ba dei khmih haba ïadei bad ki jaka kiba hap ha u pud u sam ka KHADC (tribe certificate from competent authority for areas under KHADC jurisdiction).
U Bah Paul u la ong ba ka shithi kaba pynmih da ka tnat kam lah ban long halor ïa ka aiñ; kata kamut ka shithi kaba pynmih ha ka 21 tarik u Naitung, 2020 kam lah ban long kham halor ïa ka Lineage Act 1997 bad ka jingai syrnot hi ka dei ban long katkum ki kyndon jong ka aiñ kaba ïaid katkum ka riti ka dustur jong ka jingshim jait na ka kmie ym ban shim jait na u kpa.
Une u Myntri u la ong ba kane ka rai ban weng ïa kum katei ka shithi ka dei katkum ka aiñ jong ka KHADC kaba bud ïa ka riti dustur bad na ka bynta ban ai syrnot donkam ban pynbeit namar ba ka OM kaba 19 tarik u Lber 2014 ka don ka jingbymbiang ha ka.
U la bynrap da kaba ong ba kito ki bym dei na ka jait kmie ki hap ban leit shwa sha KHADC ban ïoh ka jingpynshisha ha shwa ban ai ïa ki ka syrnot ST.
