Shillong, Jymmang 03
Ki nongkamai kali kiba don hapoh ka synjuk jong ka East Khasi Hills Local Taxi Welfare Association (EKHLTWA) ha ka 3 tarik u Jymmang, ki la leit sha thanat Lumdiengjri ban leit ujor ha kaba ïadei bad ka jingdon kiba kamai kali be-aiñ.
Katkum ka jingïathuh u Bah Mangkara Shylla uba dei u Organising Secretary ka synjuk, u la ïathuh ba ha ka 2 tarik u bnai Jymmang ki la lap ba ki la don ki kali kiba la kamai da kaba shu tuh ïa ki nombar plate jong kiwei ki kali bad ki la kamai suk khlem da don satia ïa ki kot ki sla kiba biang bad khlem da donkam ban siew ïa ka khajna sha ka sorkar.
Na ka liang utei u Organising Secretary u la ong ba lada ka seng ka dang ïai lap biang nangne shakmat ïa kum kine ki briew kiba shu wan kamai ei, ka seng kan nym map bad kan ai ïa ki kyndon kiba tyngeh ïa kitei ki briew.
Ka seng ka la kyntu ruh ïa ka tnad pulit ba pynïaid ïa ki kali ba kin shimkhia halor kane bad ki dei ban talasi man ka por ïa ki kali ym ban shu peit lyngba ka ‘online’ bad kumjuh ruh u la kyntu ïa ki nongtrei hapoh ka ophis u DTO ba kim dei ban shu shong hapoh ophis hynrei ba kin mih ban leit talasi hi ïa ki kali khang ban lap ïa kane ka jingleh tuh ban kamai kali.
“Ngi kyntu ruh ïa ka tnad pulit pynïaid kali ba kan shimkhia halor kane bad ka dei ruh ban buh ïa ka jingtalasi man la ka por bad kumjuh ruh ïa ka tnad DTO, ngi hap ban kyntu ba kin mih bad talasi namar ki shu ïa shong hangto khlem ka jingtrei sha madan kin ym lap ïa ka jingdon sha surok”, la ong u Bah Shylla. Shuh shuh u Bah Shylla u la ong ba na ka liang ka seng kam don ka jingbah-khlieh bad ithuh hi ïa kitei ki briew kiba kamai tuh bad kum ka seng kam tip shano ki kamai ruh.
