Mairang, Jymmang 03
“I Mei i dang don ha ïing, bad katba nga dang mih na paiñkhana ban rung sha ïing, uwei u briew u la pynap ïa nga da ka tari bad ha kata ka por, nga la pyrshang ban ïaksaid ban lait,” la ong ka khynnah kaba na kawei ka shnong ha Eastern West Khasi Hills ha ka Sngi Thohdieng haba ïathuh ïa kaei kaba la jia ha shwa ba arngut kin shah bom shah tied ha u paidbhur halor ka jingkynnoh ba ki la pyrshang ban batbor ïa kane ka khynnah.
Kine kiba la shah tied ha u paidbhur ki la khlad noh bad ki dei na kawei pat ka shnong.
Haba kren sha ki lad pathai khubor mynta ka miet, katei ka khynnah ka la ong ba ka la pyrshang ban ïakhun ban peit ïa ka dur khmat jong uta uba la pynap da ka tari namar u la kah ïa la ka dur da ka jaiñ.
Hynrei ha mar ba ka ïoh ban peit, ka la ong ba ka la shu stem ki khmat bad ka la shu kyllon la ka kyllon. Hadien pat ynda ka la kyndit, ka la ong ba ka la lap ba ki jaiñ ki nep kim don shuh bad nangta ka la khie bad leit kyrsiew ïa ka kmie-ieid namar ka kmie jong ka ruh kam kyndit bynriew shuh.
Nalor nangta ka la ïathuh ruh ba ha ka por ba ki nongshong shnong ki la wan ïalam ïa uta u briew ha ïing jong ka, kam shym lah ban pynithuh bad kam pat tip eiei. Hynrei ynda la leit sha Dorbar Hall da la dep ban bta ïa la ki khmat, ka la lah ban ithuh ïa kitei ki briew lyngba ka jaiñ ba la kah ïa ka dur khmat jong uta u briew. Ka la ong ruh ba ka la ithuh ïa uta u briew uba long uba sngaid bad ïa kane ka la ïathuh ha ka shnong.
Ka la ïathuh ruh ba kitei ki ar ngut ki la don lypa ha ïing ha kaba uwei u dang peit briew bad uwei u dang pynap da ka tari. Ka la ong ruh ba nyngkong ka ïohi shwa ïa uba kah dur da ka jaiñ uba la ap lypa ha kamra thiah bad uwei ha kamra shongkai bad hadien ba ki la dep kita ki ar ngut ki la phet noh nangtei na ïing bad mar sien kyndit ka la leit ban ïathuh ïa la ka kmie ba don uba wan pynap tari ïa ka na ryndang bad hadien la pyntip noh lyngba ka ‘phone’ kaba la pynlong ïa kiba bun ban leit thwet ïa kitei ki ar ngut tad haduh ban da lap.
Shuh shuh ka la ïathuh ba utei u briew uba pynap da ka tari u la byrngem ba kam dei ban hylla bad ka la ïathuh ruh ba ki la mut ban thombor shwa ïa ka kmie jong ka. Hynrei, kane ka jingthmu ba sniew jong kitei ar ngut ka khlem urlong namar ka la lap noh ma ka ka khun.
Ka la ïathuh ruh ba ka dang don ka dak mong ba pynap tari na ryndang kaba ki paidbah nongshong shnong ki la ïarap ban pyntah dawai. Ka la ong ba kita ki briew kim pat dih buaid hynrei hadien ba wan ha ïing ka tip ba ki la song kyiad ha kata ka jaiñ.
“Ha ka por ba rah ïa kita ki ar ngut, nyngkong nga khlem lah ban ithuh. Hadien ba la sait khmat bad ha ka jingwanrah ïa kata ka jaiñ, nga sa lah ban ithuh ïa uta u briew. Kita ki arngut ki khlem ong eiei ruh bad ki la sngap beit ïa ki jingkylli ki nongïalam shnong,” la bynrap katei ka khynnah.
Ka la ïathuh ba kam pat ju ïohi ne ithuh ïa kitei ar ngut lait noh tang mynta ka sngi bad ka la ong ba don tang uwei napdeng kine ar ngut uba la ktah kti ïa ka.
