Mawkyrwat, Jymmang 03
Kum ka dak ka jingïaroh bad ka jingai burom ïa ki kam shlur jong u heprit Elambok Dkhar (13 snem ka rta) uba la len lade ïa la ka jong ka jingim ban pyllait im ïa ka samla Saphibanroy Thongni ha ka 21 tarik u Ïaïong, 2024 ha Wah Rilang, ki tnad komiti bapher-bapher jong ka shnong Wahsiej naduh ki skul, ka Seng Samla Shnong, ka Dorbar Shnong Wahsiej, ka Sport Club lem bad ki ophis Sorkar naduh ka ophis jong u Deputy Commissioner, ophis jong u Block Development Officer Mawkyrwat C&RD Block , District Child Protection Officer, District Social Welfare Officer, ophis jong U Superintendent ha ka 3 tarik u Jymmang 2024 ki la ïoh ban pynkup burom ‘riewshkur ïa u heprit Elambok Dkhar ha Dorbar Hall, Wahsiej, South West Khasi Hills District.
Ha kane ka sngi la ïadonlang u Bah T. Lyngwa, Deputy Commissioner ka South West Khasi Hills District, Bah K. Marweiñ, Myntri Shnong Wahsiej, Bah Paul Wahlang , Bah E .Tariang, Kong A. Sawkmie, ki bahaïing hasem u heprit Elambok na Wahsiej bad Kynshi lem bad ki paidbah nongshong shnong.
U Bah T. Lyngwa haba ai jingkren ha kane ka sngi u la pynïasyriem ïa ki kam shlur u heprit Elambok Dkhar uba la len lade ïa la ka jong ka jingim bad u Syiem David uba la pynïap ïa ka dngiem bad jop ïa u nongïapom bakhraw, u Goliath.
U la ai burom ruh ïa ki bahaïng hasem kiba la sei ïa une u ‘riewshlur uba U Blei Nongbuh Nongthaw u la pyni ha u ïa ki kam ba khraw.
Ha kaba ïadei bad ki shlur jong une u heprit, u Bah Lyngwa u la kular ba un sa trei shitom ban phah ïa ka kyrteng u Elambok Dkhar ban ïoh pdiang ïa ka kam shlur na u Myntri Rangbahduh ka Ri India.
U la bynrap ruh ba ka jingpynkup burom ïa u heprit Elambok kan long ka nuksa ïa kiwei pat ban pynshlur ba kin leh ïa kino-kino ki kam kiba khraw wat la i long i kam barit ruh hynrei haba leh ïa ka kam kaba bha hangta kein ka shong ka nam, la ong u Bah Lyngwa.
Ha kane ka sngi kiwei pat ki nongkren baroh ki la ai ka jingkyrkhu kyrdoh bad ai ka jingïaroh ïa ki kam shlur bad ki la kitbok kitrwiang ruh ïa u heprit Elambok Dkhar ba un ïoh rung ha ka thup jong ki 25 ngut ki para ‘riewshlur jong ka Ri India ban ïoh pdiang ïa ka ‘National Bravery Award’ na u Prime Minister ka Ri India.
Shuh shuh ha kane ka sngi ka Dorbar Shnong Wahsiej ka la pynkup burom ruh ïa u Bah Lambok Thongni uba la ïarap ban sei ïa artylli ki metïap jong samla kynthei kiba la ngam jyllop ha Wah Rilang.
