Shillong, Jymmang 05
Ka Jylla ka la sakhi ïa ka jinghap slap ha ka Sngi U Blei kaba la long ka jingkyrmen ïa ki nongshong shnong khamtam eh ka jingshngaiñ biang ïa ki tyllong um bad ki wah kiba la nang rngat namar ka jingshit kyrang ka sngi bad jingtyrkhong ka suiñbneng ha kine ki taïew ba la dep.
Ha nongbah Shillong, la sakhi ïa ka jinghap u slap bajur kumba lai sien ha ka Sngi U Blei; kata ha ka por mynstep, nohphai sngi bad mynmiet.
Ha ka por mynstep, ka suiñbneng ka la ïong ngit ha ryngkat ka jingsawa u pyrthat ha shwa ban hap u slap bajur bad ki don ruh ki jaka ha kaba hap lang bad u phria.
U slap u la hap biang ha ka nohphai sngi tang kumba katto-katne por. Nangta ha ka por miet, u slap u la hap biang kaba long shisha ka jingtngen ïa ka mei mariang hadien ka jingshit jong ka sngi kaba la pynkhuslai ïa ki nongshong shnong ha ki sngi kiba la leit.
Ka jingtyrkhong ka suiñbneng ha kine ki taïew ba la leit ka la buh jingma shisha ïa ki tyllong um ha ka Jylla ha kaba ki wah bad ki tyllong um kiba tuid sha Dam Mawphlang ruh ki la nang rit bad rngat.
U Myntri ka tnat PHE u Marcuise N Marak ruh u la kubur ba la jan baroh ki tyllong um ki la rngat ha kylleng ki jaka kynthup ruh ki tyllong um kiba tan um na ka bynta ka skhim Jal Jeevan Mission (JJM) ha kylleng ki shnong.
Kumta u la kyntu ïa ki paidbah ka Jylla ban long adkar ha ka rukom pyndonkam ïa ka um bad ban sumar ïa ka mei mariang khamtam ki jaka kiba don ki tyllong um.
Da ka jinghap slap ha ka Sngi U Blei ka jingshit ruh ka la kham hiar na kaba ju long baroh shikatta. Lada bteng kumne ka jinghap slap ha kine ki sngi ban wan kan long shisha ka jingshngaiñ ïa ki wah bad ki tyllong um kiba ju pyndap ïa ka jingdonkam um jong ki nongshong shnong ha kylleng.
Ka jinghap u slap bajur ka la pynlong ruh ïa ki katto-katne ki jaka ban slei um ha kaba ki nala ruh ki la sahkut da ki plastik namar ka jingther kynsan u slap.
