Jowai, Jymmang 05
Ha ka thong jong ka ‘World No Tobacco Day 2024’ ka ban long ha ka 31 tarik Jymmang, ka tnad pule-puthi jong ka Sorkar Jylla ryngkat ka National Health Mission (NHM), Tobacco Control Cell ki la pynlong ïa ki prokram kyrpang na ka bynta ki khynnah skul kaba tip kum ka “Walk for My Meghalaya-Tobacco Free Meghalaya”.
Ha West Jaiñtia Hills District, ha kine ki sngi la ïohi ïa ka jingmih ïashim bynta ki skul ryngkat ki nonghikai ban ïaid sha surok da kaba rah lang ïa ki dur ba thoh ïa ki kyntien kit jingmut halor ka jingsniew jong u sikret, biri, duma bad ki khynnah skul ki la ïashim bynta ruh ha ka ‘Poster Wall’ ne ka jingtah ïa ki dur ba la dro da ki khynnah ha man ki jaka paidbah.
Ha Jowai, ki skul kiba la pynlong ïa kine ki prokram ki kynthup ïa ka Seiñraij Higher Secondary School, Jowai, Seiñraij UPS, Seiñraij Govt. LPS, Panaliar Secondary School, Jowai, Panaliar UPS SSA, Panaliar Govt. LPS, Panaliar English School, Jowai bad ka Welcome Gayang Memorial School, Jowai.
Ïa kane ka prokram la pynlong ruh ha ka dur jong ka jingïakob hapdeng ki skul kynthup ki Lower Primary, Upper Primary, Secondary bad Higher Secondary bad ka ban long naduh na Block Level, District Level bad State Level ha kaba ka tarik khatduh jong ka jingïakob kan kut ha ka 20 tarik Jymmang.
