Shillong, Jymmang 05
Kum shi bynta ban pynbha ïa ki lad jingsumar ha ki Jylla ka Thaiñ Shatei Lam Mihngi, ka Shillong ha ka sien banyngkong ka la ïoh ban pynlong ïa ka ‘Regional Workshop’ ha kaba ki ‘riewtbit ha ka liang ka koit ka khiah ki la ïashim bynta lang ha kane ka prokram.
Ïa kane ka ‘workshop’ ba la pynlong da ka tnad ka koit ka khiah ka Sorkar India ha ryngkat ka jingïasnohktilang bad ka tnad ka koit ka khiah ka Sorkar Jylla, la pynlong ha ka 3 bad 4 tarik mynta u bnai ha kaba la sakhi ïa ka jingïadonlang jong ki ophisar ka koit ka khiah, ‘riewtbit bad ki briew ba don ka jingsngewkhia na kylleng ka thaiñ.
Haba ai jingkren, u Apurva Chandra, IAS, Secretary ka tnad ka koit ka khiah ka Sorkar India u la kdew ba kane ka jingïalang kan ïarap shi kat dei ha ka ban ïasam ïa ki buit bad ki jingshna thymmai hapdeng ki Jylla. Ka jingïadei jong ka jingdon ki jaka sumar hapoh Meghalaya ka kham kiew haba ïanujor bad kiwei-kiwei ki Jylla ka Thaiñ Shatei Lam Mihngi. U la pyntikna ba ka ‘telemedicine’ ka long kawei na ki bynta kaba pynmyntoi shibun ïa ka Thaiñ Shatei Lam Mihngi namar ka jinglong-jingman jong ka jaka.
U Sampath Kumar, IAS, Principal Secretary ka tnad ka koit ka khiah, ka Sorkar Jylla u la ong ba ka jingjop jong ka ‘Rescue Mission’ lem bad ka NHM ha ka ban pynduna ïa ka jingïap jong ki longkmie armet bad ki khyllung ba dang shu kha ka paw shai ha ki kam.
U la kren ruh halor ka Chief Minister’s Safe Motherhood Scheme, kaba thmu ban kyntiew ïa ki jingdonkam, ha kajuh ka por ban pyntikna ïa ka jingkha khyllung ha ki shlem ai jingsumar, khamtam na bynta kito kiba don jingma ha ka jingarmet, ki ‘Transit Home’ ba la pynbiang da ki SHG, ka jingkyrshan ha ka leit ka wan, bad ki sienjam na bynta ka TBA, ka ban jur halor ka jingminot ka Jylla haba ïadei bad ka koit ka khiah jong ki longkmie bad ki khyllung-khynnah.
Na ka liang u Sampath Kumar u la bynrap ba ka Sorkar Jylla ka la pynithuh ïa 1700 tylli ki shnong ban buh ïa ki nos ha ka imlang-salang ne ki ‘Community Nurse’ da kaba jied ïa ki dkhot na ki Village Health Council (VHC) ha kaba kin ïadon bynta lang ha ka imlang-shalang.
Ka jingwad jingtip ka National Health Resource System Centre (NHRSC) ka kdew ba 93% na ki nongpang hapoh ka Jylla ki ïoh pdiang ïa ki dawai na ki jaka sumar ka Sorkar, da kaba ban jur halor ka jinglehbha ka Meghalaya kum ka ‘Outlier’ ha u snem 2023.
Ka Aradhana Patnaik, IAS, Mission Director, NHM & Additional Secretary, ka tnad ka koit ka khiah ka Sorkar Pdeng ka la ong ba man la ki jaka sumar Sorkar ki dei ban pynneh ïa ki kyrdan da kaba bud ryntih ïa ki kyndon jong ka Indian Public Health Standard (IPHS). Ha kajuh ka por, ka la ai jingïaroh halor ka jinglehbha ki Meghalaya Village Health Council (VHC) bad kyntu ïa kiwei pat ki Jylla ha Thaiñ Sahtei Lam Mihngi ban hikai ïadei bad ban bud ïa kine ki nuksa.
Na ka liang kitei ki ‘riew tbit ka koit ka khiah lem bad ki heh ophisar ki la leit jngoh ruh ïa ki jaka sumar bapher-bapher kiba ha Shillong, Sohra, Mawphlang, Mawngap, Mawkdok, Jongsha, Thynroit bad kiwei-kiwei, ïa kaba la bud sa ka jingbtai bniah halor ki mat kiba donkam kum ka Service Delivery in Comprehensive Primary Healthcare (CPHC).
Shuh shuh u Chandra, u la leit jngoh ïa ka North Eastern Indira Gandhi Regional Institute of Health & Medical Sciences (NEIGRIHMS) bad ka New Undergraduate Medical College, Regional Cancer Center, Nursing College, Virtual Autopsy, New CATH LAB, bad ka Construction Critical Care Block bathymmai – 150 jingthiah.
