Shillong, Jymmang 05
Nalor ka projek kaba dei ban ïada ïa ki jaka khlaw (catchment area) kiba don ki wah bad tyllong um, ka Jylla ka la ïoh ruh sa ka projek kaba ïarap ban pynim pat ïa ki um ki wah lyngba ka tnat Soil and Water Conservation.
Kane ka projek ka dei kaba wan lyngba ka Asian Development Bank (ADB) kumba T. 400 klur ei ei. Kane ka projek ka dei na ka bynta ban pynneh biang ïa ki tyllong um bad pynkhlaiñ ïa ka um shapoh khyndew (underground water).
U Myntri ka tnat Soil and Water Conservation u Marcuise N Marak u la ong ba kane ka projek kan ïarap kumno ban ïada ïa ki um ki wah bad ruh ban pynkhlaiñ ïa ka um shapoh khyndew.
U Marak u la ong ba ha ka jingshisha ka Sorkar ka la dep ban khot ‘tender’ hynrei namarba wan noh ka ilekshon bad ka jingtreikam ka Model Code of Conduct (MCC) la buhteng shwa ïa kane ka projek.
U la ong ba ynda la dep ka ilekshon, yn sa pynïaid shakhmat khamtam ban bhah ïa ki kam ban pyntrei ïa ka projek ha kylleng ka Jylla.
Ka Sorkar Jylla ka la sdang ban pyntrei ïa kawei ka projek ban ïada ïa ki jaka khlaw kiba don hajan ki wah bad ki tyllong um jong ka Wah Umïew ha East Khasi Hills district bad ka Wah Ganol ha Garo Hills.
Ïa kane ka projek la mang kumba T. 344 klur. Ka jingdonkam ban ïada ïa ka wah Umïew ka dei namar ka jingjur palat ka jingtih maw tih shyiap harud jong kane wah kaba lah ban ktah ïa ka um namar la pyntuid ïa ka khyndew bad shyiap sha ki wah kaba pynrngat ïa ka um.
