Shillong, Jymmang 05
U nongaiktien ka National Peoples’ Party Youth Wing (NPPYW) uba dei ruh u MDC ka Rambrai-Jyrngam, Bah Bajop Pyngrope, u la pynpaw ka jinglyngngoh ba ha ka jingïasoi la pyni ba la dep ai lut ïa ka pisa katba u trai jaka u Bah Nolip Lyngdoh u ong ba dang ïoh tang T. 10 lak na ka T. 35 lak ban thied ïa ka jaka ha Jakrem-Mawkyrwat kaba hap ha South West Khasi Hills District.
“Kane ka jingthied jaka ka KHADC sha Jakrem ka dei ha ki shiphew snem mynshwa hynrei ka la pynsah lyngngoh ïa ngi ki MDC kiba wan thymmai namar kane ka pisa kiba la pynlut ka dei jong ki paidbah,” u la ong.
U la ong ba ha kane ka jingïalap ilekshon MP Lok Sabha kane ka jingïathied jaka ka KHADC ha Jakrem ka la paw pyrthei hadien ba u President ka Voice of the People Party (VPP) Bah Ardent Basaïawmoit u la ujor ejahar ïa u Bah Donkupar Sumer u MDC barim ka Umsning constituency bad u Bah Sumer ruh u la ujor kylla da ka ejahar.
U Bah Bajop u la ong ba ha kato ka kot kaba ki la dep soi la ïohi ruh ïa ka jingsoi ki trai jaka ba ki la ïoh ïa ka pisa baroh, hynrei kaba lyngngoh ba u trai jaka u khlem ai ïa ka KHADC ba kan pyndonkam namar u la kynnoh ba um pat ïoh lut namar u ïoh tang ` 10 lak.
“Nga sngewlyngngoh ba ha ki 10 snem mynshwa kumno ka KHADC hapoh ka jingïalam u Bah Ardent Basaïawmoit ki leit thied jaka ha ka dor T. 300 shi sq.ft. ha Jakrem kaba shongdor T. 35 lak ha ka 11,000 sq.ft. tam ka jaka,” u la ong.
U Bah Bajop u la ong ba kane ka jingïakynnoh kan sa paw pyrthei hadien ba ki pulit ki la tohkit ban lap ïa ka jingshisha mano ba leh bakla.
Shuh shuh u la pyntip ba ka KHADC ka ïoh pat da kawei ka jaka ha Mawkyrwat kaba ki trai jaka ki la ai sngewbha, hynrei ka jaka ba la dep thied da ka KHADC na u Bah Nolip Lyngdoh kam shym pat ïoh pyndonkam namar ba u kynnoh bym pat ïoh lut ka pisa.
