Shillong, Jymmang 05
Ki pulit ka Eastern West Khasi Hills ha ka Sngi Saitjaiñ ki la ïathuh ba ka jingdon jong u paidbhur ha ka shnong Umthlong ha ka Sngi Thohdieng kam duna shuh ïa ka 1,500 ngut, bad u paidbhur u la khang lad ïa u majistor bad ki pulit ban shimti ïa ki arngut ki briew kiba la shah kynnoh ba ki la thmu batbor ïa kawei ka khynnah, bad ka jingshah bom shah tied ha u paidbhur ka la pynlong ïa kine ki arngut ba kin khlad noh.
Ki la ong ba ka jingshah bom jingshah tied jong kitei ki arngut ha ka Sngi Thohdieng ka la jia ha ka por kumba 5:30 janmiet eiei.
Ki pulit ki la ïathuh ba u Officer-in-Charge (OC) ka thanat Mairang u la ïoh ïa ka jingpyntip lyngba ka ‘phone’ ha ka por kumba 4:05 janmiet na u Sordar ka shnong Umthlong uba la ïathuh ba la kem ïa arngut ki briew bad la buh ïa ki ha ka ïing dorbar jong ka shnong hadien ba la kynnoh ba ki la pyrshang ban batbor ïa kawei ka khynnah 18 snem ha ka ïing sah jong ka. La ong ruh ba ïa kitei ki briew la wanrah sha ïing dorbar shnong ha ka por kumba 1:30 mynsngi. Hynrei, haba u majistor bad ki pulit ki la poi ha ka shnong Umthlong ha ka por kumba 4:55 janmiet, u paidbhur uba la ïalum u khlem shah ïa u majistor bad pulit ban shimti noh ïa kitei ki arngut ki briew.
Shuh shuh ki pulit ki la ong ba katba u majistor u dang ïakren bad katto-katne ngut ki paidbah ban shah ïa ki pulit ban shimti ïa kitei ki arngut, kynsan-kynsan ki la don ki paidbah kiba la leit tur sha katei ka ïing dorbar shnong bad ki la kynjat bad pynpra ïa ka jingkhang ha shwa ba kin shoh kin dat ïa kitei ki arngut.
Hadien kata, ki pulit ki la ong ba u paidbhur u la pra noh na katei ka jaka, bad na ka liang u majistor, u la phah wan mar-mar ïa ka kali kit nongpang, bad la rah noh ïa kitei ki arngut sha Tirot Sing Civil Hospital, Mairang.
Hynrei, ynda la poi ha katei ka jaka sumar ha ka por kumba 7 baje janmiet, ki doktor kiba peit ki la pynbna ba uwei na kiba la mynsaw, ïa uba la tip kyrteng kum u Melar Kurbah, 35 snem ka rta na ka shnong Demthring, East Khasi Hills, u la dep khlad lypa katba sa uwei pat, u Hasmendra Kharkylliang, 50 snem ka rta na ka shnong Shyrwang, Eastern West Khasi Hills, la pynkit noh sha Shillong Civil Hospital. Tangba ynda la poi ha Shillong Civil Hospital, ki doktor ki la pynbna ba une u rangbah u la dep khlad lypa shwa.
Ha kawei pat ka liang, ki pulit ki la ïoh pdiang ïa artylli ki jingujor lane First Information Report (FIR) ha kaba ïadei bad ka jingjia ha ka shnong Umthlong ha ka Sngi Thohdieng.
Ki pulit ki la pyntip ba ki la ïoh ïa ka FIR na ka liang ka khynnah kaba la kynnoh ba la don ba thmu ban batbor ïa ka bad sa kawei pat ka FIR ka dei na ka liang ki bahaïing hasem jong kitei arngut kiba la khlad hadien ba ki la shah bom shah tied ha u paidbhur ha Umthlong halor ka jingkynnoh ba ki la thmu ban batbor ïa katei ka khynnah.
Ka FIR kaba nyngkong ba la ïoh na katei ka khynnah ka dei Mairang Police Station Case 24 (05) 2024 hapoh ki kyndon 376 D bad 324 jong ka Indian Penal Code (IPC).
Ka FIR kaba ar na ki bahaïing hasem jong kiba la khlad ka dei ka Mairang Police Station Case Number 25 (05) 2024 hapoh ki kyndon 120 B, 302 bad 34 jong ka Indian Penal Code. Ki pulit ki la pdiang ïa baroh artylli kitei ki FIR bad ka jingtohkit ka la ïaid.
