Shillong, Jymmang 06
Kawei ka samla kaba pule ha Shillong Polytechnic ka la pynkut noh ïa la ka jong ka jingim da kaba sdien phasi ïalade ha ka hostel ba ka sah kaba don ha kane ka jaka pule.
Kane ka jingdkhat jubor ïa la ka jingim da kane ka samla kaba dei na Tura bad kaba pule ïa ka course Civil Engineering ha Shillong Polytechnic, ka la jia ha ka Lah Sngi U Blei bad ïa ka metïap jong ka, la lap da ki samla pule kynthei kiba sah lang ha kane ka hostel.
Katkum ka khubor kaba la ïohlum la ïathuh ba kane ka samla pule kaba dang 24 snem ka rta, na ka shnong Dakopgre, Tura ha West Garo Hills District ka dei kaba dang pule mynta ïa ka 4th Semester ha ka Civil Engineering.
Shuh shuh la ong ba kane ka samla ba dkhat jubor ïa la ka jingim, ka la pyndonkam da ka jaiñ tawlia ne ka Gamucha da kaba teh ha ki Grill ne nar jong ka jingkhang ïit kaba don ha ka mala ba-ar jong ka hostel.
Na ka liang jong ki samla kiba la lap ïa kane ka jingjia, mar-mar ki la pyrta bad lynñiar kliang kaba la pynlong ruh ïa u nongap pahara bad ïa ka nongap jong kane ka hostel ba kin leit mareh wut-wut.
Hadien ba la lap bad ïohi ïa kaei kaba la jia, na ka liang ki bor pynïaid kane ka jaka pule ki la pyntip noh mar-mar sha thanat Mawlai, kiba la wan sha kane ka jaka bad ban shimti ïa ka metïap ban pynkit pat sha Shillong Civil Hospital na ka bynta ban pyndep ïa ka post-mortem.
