Shillong, Jymmang 06
U Myntri Rangbah ka Jylla, u Conrad K. Sangma u la leit jurip ïa ka kam (ba dang ïaid) haba ïadei bad ka jingpyndait ïa ka kor ba pynïaphiah ïa ka jaboh-jabaiñ kaba ha Rongkhon Songgital, Tura, West Garo Hills.
Ha kane ka sngi la donlang ruh u Myntri ka tnat PHE, u Marcuise Marak bad Chairman ka MUDA, u Bah Wailadmiki Shylla.
Haba ïadei bad ka jingpyndait ïa katei ka kor, yn pyndonkam da ki kor kiba kit ba bah bad ba khlong khyndew ban tih ïa ka jaboh na ka jaka bret ñuit.
Ïa ka jaboh yn phiah ha ki lai bynta – ‘organic’/’soiled fraction’, ‘combustible’, bad ‘inert waste’.
U Myntri Rangbah u la ong, “Ïa ka jaboh yn phiah da kaba pyndonkam ïa ki kor teknoliji, ha kaba yn sa pynkylla pat sha ki mar bapher-bapher ba kynthup ïa ka sboh.”
U la kdew ba ïa ka teknoliji kaba la pyndonkam la dep pyrshang, da kaba ai nuksa ïa ka jingpyndonkam jong ka ha Marten, Shillong bad ha Tinsukia, Assam.
“Ngi khmih lynti ba lyngba ka jingpyndonkam ïa kane ka teknoliji, ngin sa lah ban shimkhia ïa ka mat jong ka jaboh ha kiwei-kiwei ki bynta jong ka Jylla kumjuh,” la bynrap u Myntri Rangbah.
U la ong ruh ba ka Sorkar ka la bthah ïa baroh ki tnat treikam Municipal hapoh ka Jylla ban pyntikna ïa ka jingphiah ïa u ñiut ha ki ïing ki sem bad ka imlang sahlang na bynta ka jingmanbha ha ka ban bret ïa ka jaboh hadien habud.
“Ka jaboh kaba ha Rongkhon Songgital ka la buh jingeh ïa ki nongshong shnong ka Tura, bad ngi khmih lynti ba shisien ba la pyntreikam ïa kane ka projek, yn sa lah ban pynbeit ïa kaba bun na ka jingeh,” u la ong da kaba bynrap ba kane ka projek kan treikam ha kine ki khyndiat bnai ban wan.
