Mawkyrwat, Jymmang 06
Ki pulit ka thanat Mawkyrwat ha ka 6 tarik Jymmang, 2024 ki la pyntikna ba baroh 3 ngut ki briew kiba la shah kem halor ka jingsuba donkti ban pynïap dusmon ïa uwei u rangbah ba la tip kyrteng kum u Pynskhemlang Lyngkhoi (27) na ka shong Nongbah Marshillong, 3 km eiei na Mawkyrwat ha South West Khasi Hills District, ki dei kiba la kyrni ha ka dih drok.
Kine ki briew kiba la shah kem noh dang shen ha ki pulit ki kynthup ïa u Paul Andrew Lakiang (24) na Mawkyrwat, u Michael Wanniang na Marshillong bad u Ricky Paul Snaitang na Nonglang.
Lah ban kdew hangne ba ha ka 2 tarik u Ïaïong, 2024 ki paidbah nongshong shnong ki la lap ïa ka metïap jong u Pynskhemlang Lyngkhoi (ba la khlad) kaba don ïa ki dak mong na ki bynta jong u ryndang, ka kti kamon bad kiwei de ki bynta jong ka met na kawei ka jaka hajan ka pynthor kba ha Riatthawlong kaba hap hapoh ka shnong Mawkyrwat bad kaba dei ruh ka lynti ban leit sha shnong Marshillong.
Haba kren ha u nongaikhubor, ki pulit ka thanat Mawkyrwat ki la ïathuh ba baroh lai ngut kine ki briew ki dei kiba kyrni dih drok, bad ki la shah kem teng ruh ha ki pulit haba ïa dei bad ki kam tuh kam thiem.
