Mairang, Jymmang 06
Kumba 14 tylli ki shnong kiba kynthup ha 2 tylli ki Block hapoh ka Eastern West Khasi Hills (EWKH) bad kumba 400 ngut eiei ki nongshong shnong ki la shah ktah hadien ba u slap, u phria bad ka lyer bajur bha ki la ther tyngeh ha ka 5 bad 6 tarik mynta u bnai.
Ïa kane la pynthikna ruh da u Deputy Commissioner (DC) ka Eastern West Khasi Hills u Bah G Kharmawphlang, IAS, haba kren ha u nongthoh khubor halor kane ka phang.
U DC u la ong ruh ba na ka liang ki bor District ki dang ïaleh ban pynbit pynbiang ïa baroh ki jingdonkam bad shen yn sa pyllait noh ïa ki lad jingïarap sha kiba la shah ktah.
Ka tyllong khubor ka ong ba ha katei ka jinghap jong u phria, u slap bad ka ‘erïong; kaba kham shah ktah jur ka dei ka shnong Dong Mawïong kaba hap hapoh ka shnong Nongkhlaw bad Mawnai. Kine ki shnong ki la shah ktah shibun naduh ki ïing ki sem bad khamtam ki jingthung-jingtep ha kaba ka shnong Mawnai ka la shah pynjulor bha ha kaba ki tnum ïing ki la pei bad bun ki jingthung kiba kynthup ïa u sohplom ki la hap lut bad bun ki jhur ki la julor.
Shuh shuh ki nongrep jong kane ka thaiñ ki la pynpaw ïa ka jingsngewsih bad sngew khuslai ha kaba ki jingthung ki la julor bad nalor ha kine ki bnai ba la dep ba rang ka suiñbneng ka la pynduhnong bad mynta la hap sa u phria ka la nang duhnong shuh shuh.
Ki la pynpaw ruh ba namar ba ki im ki ïoh bam na ka rep mynta kim don shuh ka jingkyrmen. Namar kata, ki la kyntu ïa ki bor sorkar ba kin phai khmat lem sha ki, ban ïarap lem ha kaba ïadei bad kane ka jingduh kaba khraw na ka jingwan lynshop ki bor mariang.
U Sordar ka shnong Mawnai u Bah Syndarsin Marbaniang u la ïathuh ba ka jingjulor ka la kham jur palat ïa ki jingthung-jingtep ban ïa ki ïing ki sem. Halor kane ka jingshah lynshop la dep ban pyntip sha ka Block bad ha kaba na ka liang ki briew na ka tnat ka rep ka riang ki la wan jurip ha kane kajuh ka sngi.
Halor ka jingther ka ‘erïong ha ka shnong Dong Mawïong, u Sordar ka shnong Nongkhlaw u la ïathuh ba kumba 6 tylli ki ïing ki la shah rat bad pynjulor ha ka ‘erïong bad kiba bun ki la julor ha kaba kawei ka longïing ka la pra phom bad kim lah shuh ban shong kaba la pynlong ba kin hap ban leit sah noh bad ki bahaïing.
