Shillong, Jymmang 08
Ka Voice of the People Party (VPP) ha ka Sngi Balang ka la kyntu ïa ka sorkar jylla ba kan thung da ka Kong Idashisha Nongrang, IPS kum ka Director-General of Police (DGP) ka jylla.
Ha u kyrwoh khubor, u Dr. Batskhem Myrboh, nongaiktien ka VPP, u la ong ba ka jingkwah jong ka seng ïa ka sorkar ban thung ïa ka Kong Nongrang kum ka khlieh duh ka tnat pulit ka long namar ka dei ka heh IPS kaba tbit ban treikam bad kaba trei shitom.
“Kan ym dei tang ka jingsarong ïa ka jylla lada ngi ïoh da ka longkmie na la ka jong ka jaitbynriew ban long kum ka khlieh duh ka tnat pulit, hynrei kan ïarap ruh ban pynïajan ïa ka jingïadei hapdeng ki pulit bad ki nongshong shnong namar ka la tip bha ïa ka jinglong-jingman ha ka jylla,” la ong u Dr. Batskhem.
Nalorkata, u la ong ruh ba kan long ka bym shonghok lada ka sorkar ka kyntait ban thung ïa ka Kong Nongrang kum ka DGP bathymmai. Ha kajuh ka por, u la ong ba ka seng kan sa phah da ka jingthoh sha ka sorkar jylla ha ka Sngi Palei.
Lah ban kdew ba ka sorkar jylla ka dang ap ban ïoh jingbit na ka Election Commission of India (ECI) ban thung DGP thymmai hadien ba ka Union Public Service Commission (UPSC) ka la phah ïa ka kyrteng jong ki lai ngut ki ophisar IPS ha kaba iwei na ki yn sa thung ha kane ka kyrdan.
Ki lai ngut ki ophisar IPS kiba ka UPSC ka la phah ïa ka kyrteng jong ki ban shah thung ha ka kyrdan DGP ki long ka Kong Idashisha Nongrang (jong u snem 1992), R P Meena (jong u snem 1993) bad Deepak Kumar (jong u snem 1994).
Ka sorkar lyngba ka tnat pulit ka la pynmih ïa ka jingpynbna ha ka Sngi Ba-ar kaba ïathuh ba u DGP ba mynta u LR Bishnoi ynda la dap ar snem ka jingshakri kum u DGP un shongthait ha ka 19 tarik mynta u bnai.
Hynrei ka jingpynbna kam pat mih halor ka jingthung DGP thymmai ha kaba iwei na kitei ki lai ngut ki ophisar IPS kin poi sha ka kyrdan DGP.
Ka Kong Nongrang kaba la kham shwa kum ka ophisar IPS ka lah ban shah thung kum ka DGP bathymmai ka Jylla bad lada ka shah thung, kan dei ruh ka ophisar IPS kynthei kaba nyngkong eh na kane ka Jylla ban poi sha kane ka kyrdan.
Ka Kong Nongrang mynta ka dang bat kum ka Director General (Civil Defence & Home Guards).
Dang shen, ka sorkar jylla ka la phah ïa ka kyrteng jong ki san ngut ki ophisar IPS sha ka UPSC ban jied ïa ki ban shah thung ha ka kyrdan DGP.
Kine ki san ngut ki long ka Kong Idashisha Nongrang, R P Meena, Deepak Kumar, GP Singh (1991 batch) bad Harmeet Singh (1992 batch). Hynrei kine ki ar ngut, kata, u G P Singh bad u Harmeet Singh kim treh ban wan shimti lada shah thung ha ka kyrdan DGP.
