Shillong, Jymmang 08
Kawei ka longkmie Khasi kaba kyrteng Basuklin Shabong bad kaba shong ba sah bad la u kurim uba dei u bar jylla, ka la phla ba shwa ba kan wan sah ha Lum Survey kaba don ha lyndet ka Them Metor ka la sah ha Mawlai Kyntonmassar bad Umsohkrot.
Ka jingphla kane ka longkmie ka dei ha ka por ba ki nongïalam ka Hynñiewtrep Youths’ Council (HYC) Sengkmie, u Additional Deputy Commissioner ka East Khasi Hills District, Municipal, Cantonment ki leit ban lum jingkheiñ ïa ki briew bad ki ïing kiba sah be-aiñ ha jaka jong ka Defense Estate.
Kane ka longkmie ka la ïathuh ba ka la sah bad u kurim u Moni Roy mynta la 15 snem ryngkat ka kiaw bad ki bahaïing bahasem.
Une u Moni Roy u la ïathuh ba mynshwa u sah ha Club bad mynta u la sah ha Lum Survey hadien ba u la ïakynduh bad ka Basuklin Shabong, hynrei um don EPIC bad u don tang ka Adhaar Card.
Ha kane ka jaka la ïohi ba uwei u shynrang uba kam ba u dei u Khasi bad uba ïoh lok da ka bar jylla ki dei kiba shong lang ryngkat bad palat 80 tylli ki longïing.
Nalorkata, ha katei ka jingleit khynra jong ka HYC, bad na ka shlem treikam u Deputy Commissioner, East Khasi Hills bad Shillong Municipal Board, la don ruh sa uwei u rangbah uba la mih shakhmat bad ban kam ïalade ba u dei u khun Khasi na ka Kur Nongrum.
Une u rangbah u la pynithuh ïalade ba u dei u Khasi hadien ba ki dkhot ka HYC ki la kylli kyrteng ïa kiba shong ba sah ha katei ka jaka ha Lum Survey.
U la ïathuh ruh ba ka kmie ka la khlad la slem bad ka dei ka Khasi na ka Kur Nongrum katba u kpa u dei u Nepali.
